Хитай террорлуққа қарши туруш бирләшмә һәрбий маниверидин чекинип чиқти

Хитай һөкүмити җүмә күни японийә, америка, канада,җәнубий корийә вә русийә қатарлиқ дөләтләр тәрипидин бу һәптиниң ахирлири елип берилидиған террорлуққа қарши деңиз үсти манивериға қатнишиштин ваз кәчкәнликини елан қилди.

Ройтерс ахбарат агентлиқиниң хәвәр қилишичә, хитай ташқи ишлар министирлиқи баянатчиси, " алақидар министирлиқлар башқа вәзипиләр билән алдираш болғанлиқтин җуңго бу қетимқи маниверға қатнашмайду " дәп тәкитлигән. Қирғинчилиқ характерлик қоралларни елип маңған вә қоралларни хитайниң шаңхәй шәһиригә елип кирмәкчи болған бир террорчилар парахотиға тосап зәрбә беришни мәзмун қилған манивер, шәнбә күни башланмақчи иди. Лекин хитай даирилири маниверға бир күн қалғанда манивердин чекинип чиққанлиқини җакарлиди.

японийә деңиз саһилини қоғдаш қисимлириниң ашкарилишичә, маниверға хитай җамаәт хәвпсизлик вә деңиз қатнаш министирлиқи қатнашмақчи болған. Маниверда қирғинчилиқ характерлик қоралларни елип маңған гуманлиқ бир парахот хитай деңиз тәвәкиликигә кирмәкчи болғанда , хитай даирилири тәрипидин рәт қилинатти вә бу парахотниң русийидики виладивистик шәһиригә кетиши үчүн башқа дөләтләрдин ярдәм сорайтти.

Хитай ташқи ишлар министирлиқи баянатчиси, җуңго сақчи вә деңиз қатнаш даирилириниң маниверға қатнишиштин немә үчүн туюқсиз йенивалғанлиқиға чүшәнчә беришни рәт қилди. японийә тәрәпниң ашкарилишичә, алақидар дөләтләр манивер өткүзүшкә 2005 - йили 9 - айда мақул болған.

Хитай җамаәт хәвпсизлик министирлиқидики манивердин хәвәрдар әрбаплар франсийә ахбарат агентлиқиға хитайниң манивердин чаршәнбә күни чекинип чиққанлиқини билдүргән вә "биз һечкимни маниверға көзәткүчи қилип әвәтмәймиз " дәп тәкитлигән. Бәзи көзәткүчиләрниң әскәртишичә, бейҗиң маниверниң шималий корийигә қаритилишидин биарам болған болуши мумкин. (Әркин)