Xitay térrorluqqa qarshi turush birleshme herbiy maniwéridin chékinip chiqti

Xitay hökümiti jüme küni yaponiye, amérika, kanada,jenubiy koriye we rusiye qatarliq döletler teripidin bu heptining axirliri élip bérilidighan térrorluqqa qarshi déngiz üsti maniwérigha qatnishishtin waz kechkenlikini élan qildi.

Roytérs axbarat agéntliqining xewer qilishiche, xitay tashqi ishlar ministirliqi bayanatchisi, " alaqidar ministirliqlar bashqa wezipiler bilen aldirash bolghanliqtin junggo bu qétimqi maniwérgha qatnashmaydu " dep tekitligen. Qirghinchiliq xaraktérlik qorallarni élip mangghan we qorallarni xitayning shangxey shehirige élip kirmekchi bolghan bir térrorchilar paraxotigha tosap zerbe bérishni mezmun qilghan maniwér, shenbe küni bashlanmaqchi idi. Lékin xitay da'iriliri maniwérgha bir kün qalghanda maniwérdin chékinip chiqqanliqini jakarlidi.

Yaponiye déngiz sahilini qoghdash qisimlirining ashkarilishiche, maniwérgha xitay jama'et xewpsizlik we déngiz qatnash ministirliqi qatnashmaqchi bolghan. Maniwérda qirghinchiliq xaraktérlik qorallarni élip mangghan gumanliq bir paraxot xitay déngiz tewekilikige kirmekchi bolghanda , xitay da'iriliri teripidin ret qilinatti we bu paraxotning rusiyidiki wiladiwistik shehirige kétishi üchün bashqa döletlerdin yardem soraytti.

Xitay tashqi ishlar ministirliqi bayanatchisi, junggo saqchi we déngiz qatnash da'irilirining maniwérgha qatnishishtin néme üchün tuyuqsiz yéniwalghanliqigha chüshenche bérishni ret qildi. Yaponiye terepning ashkarilishiche, alaqidar döletler maniwér ötküzüshke 2005 - yili 9 - ayda maqul bolghan.

Xitay jama'et xewpsizlik ministirliqidiki maniwérdin xewerdar erbaplar fransiye axbarat agéntliqigha xitayning maniwérdin charshenbe küni chékinip chiqqanliqini bildürgen we "biz héchkimni maniwérgha közetküchi qilip ewetmeymiz " dep tekitligen. Bezi közetküchilerning eskertishiche, béyjing maniwérning shimaliy koriyige qaritilishidin bi'aram bolghan bolushi mumkin. (Erkin)