Мав зедуңниң рәсимини ким ашиду базирида сетиш бикар қилинди

Хитайда коммунистик партийә инқилабиниң әпсанивий рәһбири мав зедуңниң тйәнәнмин равиқиға есилған рәсиминиң әсли нусхисини 3 - июн күни бейҗиңдики хуачен ким ашиду базирида талаштуруп сетиш пилани, җамаәт пикириниң бесими астида хитай һөкүмити тәрипидин бикар қилинди.

Хуачен ким ашиду базириниң җүмә күни елан қилишичә, мав зедуңниң рәсими 3 - июн күни базарға селинидиған боюмлар ичидин чиқириветилди. Ким ашиду базири өткән һәптә рәсимни бир милйон 200 миң йүәнгичә сетилиши мумкин, дәп пәрәз қилған. Лекин ким ашиду базириниң талаштуруп сетиш пилани хитайда талаш тартиш қозғиди вә рәсимниң сетилишиға қарши турғучилар униң музийға қоюлушини тәләп қилған.

Мав зедуңниң тйәнәнмин равиқиға есилған рәсиминиң әсли нусхисини 1950 - йили рәссам җаң җенйи сизған. Бу мав зедуңниң хитайда һакимийәтни тартивелишқа йитәкчилик қилип 1949 -йили ғәлибә қилғандин кейин сизилған тунҗи рәсими иди. Мав зедуңниң тйәнәнмин равиқиға есилған пүтүн рәсимлири җаң җенйиниң сизмиси бойичә бесилған. 57 Йил җәрянида бу рәсим хитайда һәммә адәм билидиған бир символға айланди. Мав зедуң бу рәсими есилған равақниң үстидә 1966-йили 16 - май күни каллиси әсәбийликкә толған милйонлиған "қизил қоғдиғучилар" ни қобул қилип, уларни партийә ичидики өктичиләрдин һоқуқ тартивилишқа чақирған, лекин бу хитайда сияси , иқтисади вә иҗтимаий паракәндичиликни кәлтүрүп чиқарған.

Хуачен ким ашиду базири йеқинда , рәсимниң игизлики 6 метир келидиған әсли нусхиси америкилиқ бир хитайниң қолида икәнликини вә рәсимни игисиниң талаштуруп сетиишқа чиқиридиғанлиқини елан қилған. (Әркин)