Maw zédungning resimini kim ashidu bazirida sétish bikar qilindi

Xitayda kommunistik partiye inqilabining epsaniwiy rehbiri maw zédungning tyen'enmin rawiqigha ésilghan resimining esli nusxisini 3 - iyun küni béyjingdiki xu'achén kim ashidu bazirida talashturup sétish pilani, jama'et pikirining bésimi astida xitay hökümiti teripidin bikar qilindi.

Xu'achén kim ashidu bazirining jüme küni élan qilishiche, maw zédungning resimi 3 - iyun küni bazargha sélinidighan boyumlar ichidin chiqiriwétildi. Kim ashidu baziri ötken hepte resimni bir milyon 200 ming yüen'giche sétilishi mumkin, dep perez qilghan. Lékin kim ashidu bazirining talashturup sétish pilani xitayda talash tartish qozghidi we resimning sétilishigha qarshi turghuchilar uning muziygha qoyulushini telep qilghan.

Maw zédungning tyen'enmin rawiqigha ésilghan resimining esli nusxisini 1950 - yili ressam jang jényi sizghan. Bu maw zédungning xitayda hakimiyetni tartiwélishqa yitekchilik qilip 1949 -yili ghelibe qilghandin kéyin sizilghan tunji resimi idi. Maw zédungning tyen'enmin rawiqigha ésilghan pütün resimliri jang jényining sizmisi boyiche bésilghan. 57 Yil jeryanida bu resim xitayda hemme adem bilidighan bir simwolgha aylandi. Maw zédung bu resimi ésilghan rawaqning üstide 1966-yili 16 - may küni kallisi esebiylikke tolghan milyonlighan "qizil qoghdighuchilar" ni qobul qilip, ularni partiye ichidiki öktichilerdin hoquq tartiwilishqa chaqirghan, lékin bu xitayda siyasi , iqtisadi we ijtima'iy parakendichilikni keltürüp chiqarghan.

Xu'achén kim ashidu baziri yéqinda , resimning igizliki 6 métir kélidighan esli nusxisi amérikiliq bir xitayning qolida ikenlikini we resimni igisining talashturup séti'ishqa chiqiridighanliqini élan qilghan. (Erkin)