مېكسىكا، خىتايغا قارىشى ئىقتسادىي كۈرەشتە ئامېرىكا سېپىگە قېتىلدى


2007-02-26
Share

مېكسىكا ھۆكۈمىتى دۈشەنبە كۈنى سودا ۋە تىجارەت دەۋاسىدا خىتايغا قارشى تۇنجى قەدەمنى ئېتىپ، ئامېرىكىنىڭ سېپىگە قېتىلدى.

خەۋەرلەرگە قارىغاندا، مېكسىكا ھۆكۈمىتى دۇنيا سودا تەشكىلاتىغا مۇراجىئەت قىلىپ، بېيجىڭ ھۆكۈمىتىنىڭ پۇلات، كومپيۇتېر ۋە كېيىم-كېچەك سانائىتىگە قىلىۋاتقان ياردىمى توغرىسىدا خىتاي ھۆكۈمىتى بىلەن سۆزلىشىشىنى خالايدىغانلىقىنى بىلدۈرگەن.

ئامېرىكا ھۆكۈمىتى، سودا مەسىلىسىدە پرېزىدېنت بۇش ھۆكۈمىتىدىن خىتايغا قارشى قاتتىقراق پوزىتىسيىدە بولۇشىنى تەلەپ قىلىۋاتقان ئامېرىكا دۆلەت مەجلىسىنىڭ بېسىمى بىلەن 2‏-فېۋرال كۈنى ئامېرىكا سانائەتچىلىرىنىڭ رىقابەتلىشىش كۈچىنى ئاشۇرۇش ئۈچۈن دۇنيا سودا تەشكىلاتىغا مۇراجىئەت قىلىپ، خىتاينىڭ بەزى سانائەت تارماقلىرىغا بېرىۋاتقان دۆلەت ياردىمى مەسىلىسىدە، بېيجىڭ ھۆكۈمىتى بىلەن كۆرۈشۈش تەلىپىنى ئوتتۇرىغا قويغان ئىدى.

دۇنيا سودا تەشكىلاتى مۇتەخەسسىسلىرىنىڭ بىلدۈرۈشىچە، ئەگەر 60 كۈنگىچە ئامېرىكا-خىتاي ۋە خىتاي مېكسىكونىڭ ئالاقىدار دائىرىلىرى ئوتتۇرىسىدا ئېلىپ بېرىلىدىغان سۆھبەتلەر نەتىجە بەرمىسە، دۇنيا سودا تەشكىلاتى ئامېرىكا ۋە مېكسىكىنىڭ خىتاي ھەققىدىكى ئەرزىنى بىرلەشتۈرۈشى مۇمكىن ئىكەن.

ئىككىنچى قەدەمدە دۇنيا سودا تەشكىلاتى 9 ئاي ئىچىدە خىتاي ھۆكۈمىتىنىڭ ھەرىكىتىنىڭ قانۇنلۇق ياكى قانۇنسىز ئىكەنلىكى ھەققىدە قارار چىقرىدىكەن.

ياۋرۇپا ئىتتىپاقى، ئاۋسترالىيە، ياپونىيە ۋە مېكسىكا قاتارلىق خىتاينىڭ دۇنيادىكى چوڭ سودا شېرىكلىرى، ئامېرىكا تەرىپىدىن ئېچىلغان داۋاغا ئۈچۈنچى تەرەپ بولۇپ قاتنىشىشنى خالايدىغانلىقىنى بىلدۈرگەن. ئەمما دۈشەنبە كۈنى مېكسىكا ھۆكۈمىتى دەۋاگەر بولىدىغانلىقىنى جاكارلىدى. (قانات)

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.