Xitay shirketliri iqtisadi menpe'etinila közlewatidu

Xitay xelq qurultiyi da'imiy komitétining mu'awin re'isi chéng siwiy, xitay shirketlirini ish-pa'aliyetliride peqet menpe'et qolgha keltürüshni asasliq nishan qilip, özlirining ijtima'iy mes'uliyetlirige sel qarawatidu, dep eyiblidi. U xitay xelq qurultiyini bu hadisini toxtitish üchün tedbir élishiqa chaqirdi.

Chéng siwiy düshenbe küni xitayning iqtisad zhurnilida élan qilghan maqaliside, kömür kan xojayinlirining déhqanlarni nahayiti nachar shertler astida ishleshke zorlawatqanliqini, yémeklik teyyarlaydighan shexsi shirketlerning, erzan matériyallarni ishlitip, insan salametlikige ziyanliq yémekliklerni ishlepchiqiriwatqanliqini hemde karxanilarning pa'aliyetliride muhitqa héchqandaq ehmiyet bermey, muhitni bulghawatqanliqini bildürgen. U xitay shirketlirining bundaq mes'uliyetsiz heriketliri, peqet xitay ichide nurghun mesililerni keltürüp chiqiripla qalmay, xitay shirketlirining chet döletlerde kéngiyshigimu tosqunluq qiliwatidu, dep körsetken.

Maqaliside, xitay shirketlirining bu mes'uliyetsizliklirining aldini élish kéreklikini tekitligen chéng siwiy, "hetta yéngi tereqqi qiliwatqan döletlerdimu chet'el shirketlirining bundaq mes'uliyetsizlik bilen pa'aliyet élip bérishigha yol qoyulmaydu. Shirketler tijari pa'aliyetliride peqet iqtisadiy menpe'etini qolgha keltürüshnila emes, barawerlik, ijtima'iy adalet we her qaysi guruppilar otturisidiki menpe'et tengpungliqinimu nezerge élishi kérek dep körsetken.

Mutexessisler, xitaydek kommunistik partiye hakimiyitidiki bir dölette, xelq qurultiyi da'imiy komitétining re'isi wezipisidiki bir erbabning, ijtima'iy adaletsizlik we ishchilarning hoquqining depsende boluwatqanliqi mesilisini otturigha qoyushi, xitayda ijtma'iy mesililerning qanchilik éghir ikenlikining ispati hésablinidu, déyishmekte. (Qanat)