Мәркизи партийә мәктипи уйғур ели вә тибәт районлирида техиму көплигән аз санлиқ милләт кадирлирини тәрбийилимәкчи


2007.05.01

Хитай даирилириниң үрүмчидин бәргән хәвиридин мәлум болушичә, бейҗиңдики мәркизи партийә мәктипи уйғур ели вә тебәт районида, аз санлиқ милләт кадирлирини тәрбийиләш хизмитини йәниму күчәйтип, йеқиндин буян техиму көп сандики охшимайдиған дәриҗидики миллий кадирларни охшимиған синипларда тәрбийиләшкә башлиған. Тәрбийиләнгәнләр ичидә,уйғур елидики миллий кадирлар сани 2600 нәпәрдин артуқ болуп, тибәтниңкидин бир һәссә артуқ һесаблинидикән.

Мәркизи компартийә мәктипиниң муавин башлиқи су руң " аз санлиқ милләт кадирлирини тәрбийиләш хизмити илгирики сәвийидә туривәрсә болмайду. Чүнки бу партийә вә дөләт ишлири билән бивастә мунасивәтлик. Шуңа биз мәйли мәзмун җәһәттә болсун, яки усул җәһәттә болсун, нишанимиз ениқ болған һалда,көпләп курс ечип, тәшкилләш, тәрбийиләш вә башқуруш қатарлиқ хизмәтләрни техиму изчил һалда давамлаштурушимиз керәк" дәп билдүрди.У сөзидә йәнә уйғур ели вә тибәт райониниң тәрәққият җәрянидики алаһидиликлири һәққидә тохтилип, " бундақ бир пәйттә, партийә аз санлиқ милләт кадирлириға йеңи вәзипиләрни тапшуруп, улардин техиму зор үмид күтмәктә" дәп тәкитлиди.

Дуня уйғур қурултийиниң баянатчиси дилшад ришит әпәнди бу һәқтә тохтилип," мәркизи партийә мәктипиниң уйғур елидики миллий кадирларни тәрбийиләш хизмитини илгирикидинму бәкрәк күчәйтиши уларниң уйғур елигә болған контроллуқиниңму барғансери күчийиватқанлиқини билдүриду. Шундақла уларниң мәзкур җайни мәңгу контрол қилишқа ишәнчисиниң йоқлуғини билдүриду" дәп көрсәтти. (Меһрибан)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.