Хитайда муһит вә суниң булғиниши сәвәблик инсанлар муддәттин бурун һаятидин айрилмақта

Бирләшкән дөләтләр тәшкилати балилар фонди, балиларда кесәлдин мудапиәлиниш " иммунит " күчиниң күчийишигә әгишип, 2006 ‏- йили пүтүн дуня буйичә 5 яштин бурун өлүп кетидиған балилар омумий сани 9 милйон 700 миңға азайғанлиқини , бу тарихтики тунҗи рекортни яратқанлиқини билдүрди.

Бирақ , хитай даирилири бу арида һәр йили туғулған мейиип балиларниң саниниң 800 миңдин 120 миңғичә артқанлиқини , бу йеңи туғулған балилар омумий санниң %6 тини игиләйдиғанлиқини , буниң асаслиқ сәвәбиниң муһит булғинишидин келип чиққанлиқини ашкарилиди.

Хитай мәтбуатлири дөләтлик ана - балилар сағлиқини сақлаш мәркизи мутәхәссисиниң сөзини нәқил кәлтүрүп, балиларниң мейип туғулушини кәлтүрүп чиқиридиған амилларниң һаваниң булғиниши вә сағлам болмиған турмуш адити һәмдә кечикип пәрзәнт көрүштин ибарәт икәнликини оттуриға қойған.

Тәкшүрүш нәтиҗилиридин қариғанда, мейип туғулған балиларниң 3 дин бир қисми узун яшиялмайдикән.

Әнглийидә чиқидиған " пул - муамилә " гезитиниң бу йил 7‏- айда елан қилған хәвиридә көрситилишичә, хитай һөкүмити дуня банкиси тәрипидин тәйярланған хитайниң муһит булғиниши һәққидики тәтқиқат доклатиниң әң сәзгүр мәзмунлирини чиқириветишни тәләп қилған.

" Сәзгүр мәзмунлар" ичидә оттуриға қоюлишичә, хитайда һәр йили 750 миң адәм һава вә суниң булғиниши түпәйли мудәттин бурун һаятидин айрилидикән. Болупму , һавадики чаң тозаң түпәйли һәр йили 35 милйон 400 миң адәм әҗилидин бурун қаза қилидикән. Чоң шәһәрләрдә бу хил һадисә техиму еғир икән. (Әқидә)