Xitay ajratqan muhit qoghdash xirajiti toluq ishlitilmigen

Xitay da'irilirining melum qilishiche, xitay hökümiti ajritiwatqan muhit qoghdash xirajiti éhtiyajliq orunlargha toluq yétip barmaydighan bolup, tekshürüshke asaslan'ghanda, hazirghiche ajritilghan xirajetning ٪ 30 ining iz-dériki tépilmighan.

Roytérs agéntliqining xewirige qarighanda, xitayning döletlik muhit qoghdash bash idarisidiki pilan tüzüsh ishlirigha mes'ul chén binning bildürüshiche, ötkenki besh yildin buyan hökümet her qaysi bulghan'ghan su menbeliri we tupraqlargha jem'iy 85 milyard amérika dolliri xirajet ajratqan. Emma buning٪ 70 ining shu jaylargha yétip barghanliqi éniqlan'ghan, lékin qalghan pullarning hésabi chiqmighan.

Chén bin yene, kéyinki 5 yilliq pilanda 2006 - yilidin bashlap muhit qoghdash ishliri üchün 157 milyard amérika dolliri xirajet ajritish pilanliniwatqanliqini bildürdi. Bu san xitayning dölet ichidiki ishlepchiqirish omumiy qimmitining ٪ 1.5 Ige toghra kélidiken. Emma, chén bin muhit qoghdash xirajiti az dégende ٪ 3 tin ashmighiche uning ünümini körgili bolmaydighanliqini éytti.

Muhit mesilisi nöwette xitay duch kéliwatqan éghir mesililerning biri bolup, xelq'ara jem'iyitimu xitaydiki muhit qoghdash ishlirining iqtisadning tereqqiyatigha yétishmeywatqanliqini, eger xitay buni waqtida yaxshi bir terep qilmisa, buning kelgüside xitay üchün hel qilish tes bolghan bir mesilige aylinidighanliqini ilgiri sürmekte. (Peride)