Өз һоқуқини һимайә қилғучи 7 нәпәр хитай пуқраси "макан һоқуқи" мукапатиға еришти


2006.12.07

Мәркизи шивитсарийидики хәлқара кишилик һоқуқ тәшкилати йеқинда , 7 хитай пуқрасини өз һоқуқини қоғдашта җасарәт көрсәткән дәп " макан һоқуқи " мукапати билән тәқдирлиди.

Җәнвәдә турушлуқ, йәр шаридики макан вә мәҗбурий көчүрүшкә қарши туруш мәркизиниң баянатида ейтилишичә, өз һоқуқини һимайә қилғучи шәхсләрдин хуаң вейчоң , ма ялйән қатарлиқ 7 киши, 2006 ‏- йиллиқ " макан һоқуқи " мукапатиға еришкән.

Җәнвәдә турушлуқ мәзкүр мәркәз мудириниң ейтишичә, мукапатқа еришкән 7 киши нәччә он миңлиған хитай деһқан, ишчи вә аһалиниң өз макани вә земин һоқуқини қолға кәлтүрүш һәрикити җәрянида қәһриманлиқ көрсәткән кишиләр болуп, улар хитай һөкүмитиниң адил болмиған түзүмигә қарши чиқип, өзлириниң һәққаний һоқуқини қоғдиған.

Мукапатқа еришкән бу 7 киши, өзлиригә тәвә болған маканлирини қоғдаш давамида хитай һөкүмитиниң қаттиқ тәһдити вә қанун иҗра қилғучиларниң таяқ зәрбилиригә учриған.

Йәр шаридики макан вә мәҗбурий көчүрүшкә қарши туруш мәркизиниң йеқинда елип барған статистикилиқ доклатиға қариғанда, 2003 ‏- йилидин буян, хитайда 647 миң адәм өз маканлиридин мәҗбурий көчүрвитилгән.

Гәрчә хитай сақчилири әрздарларни бастуруп һәтта солап қойған болсму, пәқәт маканлиридин айрилған колликтипниң һөкүмәткә қарши наразилиқ һәрикити 2004 ‏- йилдики 74 миң қетимдин, 2005 ‏- йили 87 миң қетимға көпәйгән.

Хитай һөкүмитиниң уйғур елидә йүргүзүватқан мәҗбурий көчүрүш һәрикитиму интайин еғир болуп, ғулҗа шәһиридә йүз бәргән бир қетимлиқ мәҗбурий көчүрүштә, бир уйғур яш өзигә от қоюп өлүвалмақчи болған иди. (Әқидә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.