Öz hoquqini himaye qilghuchi 7 neper xitay puqrasi "makan hoquqi" mukapatigha érishti

Merkizi shiwitsariyidiki xelq'ara kishilik hoquq teshkilati yéqinda , 7 xitay puqrasini öz hoquqini qoghdashta jasaret körsetken dep " makan hoquqi " mukapati bilen teqdirlidi.

Jenwede turushluq, yer sharidiki makan we mejburiy köchürüshke qarshi turush merkizining bayanatida éytilishiche, öz hoquqini himaye qilghuchi shexslerdin xu'ang wéychong , ma yalyen qatarliq 7 kishi, 2006 ‏- yilliq " makan hoquqi " mukapatigha érishken.

Jenwede turushluq mezkür merkez mudirining éytishiche, mukapatqa érishken 7 kishi nechche on minglighan xitay déhqan, ishchi we ahalining öz makani we zémin hoquqini qolgha keltürüsh herikiti jeryanida qehrimanliq körsetken kishiler bolup, ular xitay hökümitining adil bolmighan tüzümige qarshi chiqip, özlirining heqqaniy hoquqini qoghdighan.

Mukapatqa érishken bu 7 kishi, özlirige tewe bolghan makanlirini qoghdash dawamida xitay hökümitining qattiq tehditi we qanun ijra qilghuchilarning tayaq zerbilirige uchrighan.

Yer sharidiki makan we mejburiy köchürüshke qarshi turush merkizining yéqinda élip barghan statistikiliq doklatigha qarighanda, 2003 ‏- yilidin buyan, xitayda 647 ming adem öz makanliridin mejburiy köchürwitilgen.

Gerche xitay saqchiliri erzdarlarni basturup hetta solap qoyghan bolsmu, peqet makanliridin ayrilghan kolliktipning hökümetke qarshi naraziliq herikiti 2004 ‏- yildiki 74 ming qétimdin, 2005 ‏- yili 87 ming qétimgha köpeygen.

Xitay hökümitining Uyghur élide yürgüzüwatqan mejburiy köchürüsh herikitimu intayin éghir bolup, ghulja shehiride yüz bergen bir qétimliq mejburiy köchürüshte, bir Uyghur yash özige ot qoyup ölüwalmaqchi bolghan idi. (Eqide)