Xitay hökümiti "nyu - york waqti géziti" ning muxbiri jaw yenni qayta sotlaydu


2006.05.15
Share on WhatsApp
Share on WhatsApp

Xitay da'iriliri buningdin ikki ay ilgiri " nyu - york waqti géziti" ning béyjingdiki yallanma xadimi jaw yenni eyibleshtin waz kechkendin kéyin, teptish da'iriliri yéqinda uning üstidin qayta eyibname hazirlidi.

Jaw yenning adwokati mo shawpingning roytérs axbarat agéntliqigha ashkarilishiche, u xitay hökümiti jaw yenni bu qétim qandaq jinayet bilen eyibleydighanliqini bilmisimu, lékin teptish da'iriliri ötken jüme küni uninggha jaw yen üstidin eyibname hazirlighanliqini we sot mehkimisige yollighanliqini bildürgen. U, "teptish orgini manga jaw yenning dilosi üstidin qayta tekshürüsh élip bérilghanliqini we uning eyiblinidighanliqini bildürdi," deydu.

Adwokatning eskertishiche, teptish orginining bu herikitining qanun asasi yoq iken. Adwukat, jaw yenning hazirghiche tutup turulushini " pütünley qanunsizluq," dep tekitlimekte.

Xitay hökümiti buningdin ikki ay ilgiri jaw yenni eyibleshtin waz kechkenlikini élan qilghan bolup, eyni chaghda xitay dölet re'isi xu jintawning amérikini ziyaret qilishigha bir ay qalghan we xitay hökümiti xuning ziyaritini tarixiy ehmiyetke ige muhim ziyaret, dep qarap xitay - amérika munasiwitige kölenggü chüshüdighan heriketlerdin yiraq turushqa tirishmaqta idi.

Jaw yen ilgiri " jonggo islahat" zhornilining muxbiri bolup ishligen we 200 4- yili 9 - ayda qolgha élin'ghiche amérikidiki eng chong gézitlerdin "nyu - york waqti" gézitining béyjingda turushluq ishxanisida xizmet qilghan. Xitay da'iriliri jaw yenni dölet mexpiyetlikini ashkarilash bilen eyibligen bolsimu, lékin uning konkrét jinayitini élan qilip baqmidi.

Xewerlerge qarighanda jaw yen xitayning sabiq dölet re'isi jang zéminning mexsus ayropilanigha mexpiy anglash eswabi orunlashturulghanliqini ashkariliwétish weqesi bilen munasiwetlik bolushi mumkin. Lékin "nyu - york waqti géziti" bu heqtiki xewerning menbesi jaw yen ikenlikini ret qilip kelmekte. (Erkin)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.