Хитай сингапор "боғаз вақти гезити" ниң мухбирини 5 йиллиқ қамақ җазасиға һөкүм қилди

Бейҗиң шәһәрлик 2 - оттура хәлқ сот мәһкимиси сингапор " боғаз вақти гезити" ниң мухбири чен чиңни 5 йиллиқ қамақ җазасиға һөкүм қилип, 30 миң йүәнлик хитай пулиға тоғра келидиған мал - мүлкини мусарә қилғандин кейин, у һөкүмгә қайил болмай юқири дәриҗилик сот мәһкимисигә әрз сунидиғанлиқини елан қилди.

Чең чоң, сингапор" боғаз вақти гезити" ниң хоңкоңда турушлуқ мухбири болуп, хитай сот мәһкимиси уни сәйшәнбә күни тәйвәнгә җасуслуқ қилған, дәп қамақ җазасиға һөкүм қилған. Чең чоңниң аяли һөкүмни адил болмиди, дәп әйиплимәктә. У, җүмә күни хоңкоң мәтбуатлириға " сотчи униңға қарши пакитларнила көздә тутуп, уни ақлайдиған пакитларға пүтүнләй нәзәр салмиди, " дәйду.

Чең чоң, 2005 - йили 4 - айда хитай дөләт бихәтәрлик даирилири тәрипидин қолға елинған. Шинхуа ахбарат агентлиқи, чең чоңниң тәйвәнгә җасуслуқ қилидиған бир фонди җәмийәткә " дөләт мәхпийәтлики вә ахбарат" йәткүзгәнлики үчүн җинайәтчи, дәп қаралғанлиқини хәвәр қилди. Лекин тәйвән чоң қуруқлуқ комитетиниң муавин рәиси дәйвид хуаң, чең чоңниң тәйвәнгә җасуслуқ қилғанлиқини рәт қилған. У, хитай тәрәпниң баянлирини "бигунаһ мухбирға қаритилған рәзилләрчә әйибләш, " деди. (Әркин)