Jenubiy astane gézitining mu'awin bash muherriri qoyuwétildi

Bu yilliq olimpik yétip kélishtin ilgiri, xitay hökümiti bir nechche yildin buyan türmide yétiwatqan gézit muherriri yü xwaféngni türmidin boshatti. Yü xwaféng esli gu'angdung ölkiside chiqidighan awan'gart gézit: jenub astane géziti(南方都市报 ) ning mu'awin bash muherriri bolup, 2004- yili chiriklik jinayiti bilen 12 yilliq qamaq jazasigha höküm qilin'ghan idi.

2004- Yili gu'angdung soti yü xwaféngni chiriklik jinayiti bilen eyiblep 12 yilliq qamaq jazasigha höküm qilghan bolup, kéyin uning naraziliq erzi qobul qilinip türmide yétish mudditi 8 yilgha qisqartilghan idi.

Emma, nurghun kishiler yüge artilghan jinayetlerni oydurma dep qaraydighan bolup, bashqilarning tonushiche, yü xwaféng muherrirlikidiki gézitning esli 2003- yili xitayda tarqalghan saris késilini eng köp we aktip halda xewer qilghanliqi we 2003- yili bir ademning tutup turush ornida ölüp ketkenlikini xewer qilghandin kéyin saqchilarning zorawanliqigha qarshi jama'et pikrining téximu ulghiyip kétishini keltürüp chiqarghanliqi seweb bolghan iken.

Eyni waqitta mezkur gézittin jem'iy üch adem qolgha élin'ghan bolup, bularning ichide bash muherrir li minying we muherrir chéng yijunglar bar. Li minying 6 yilliq qamaq jazasigha höküm qilinip 3 yildin kéyin qoyuwétilgen bolsa, bu gézitining muherriri chéng yijung besh ay tutup turulghandin kiyin 2004- yil awghustta qoyuwétilgen.

Xitay dunya buyiche yazghuchi, muxbirlarni eng köp türmige tashlaydighan dölet bolup, hazir xitayda türmide yétiwatqan 40 neper yazghuchining 4 nepiri Uyghur ilidin.

Ötken yilining axirida dunya qelemkeshler jem'iyiti xitay prézidénti xu jintawgha ochuq xet yollap 2008- yilliq béyjing olimpikidin burun, söz, pikir we metbu'at erkinlikini hörmet qilip türmidiki mezkur yazghuchilarni qoyuwétishni telep qilghan idi. (Jüme)