Xitay hökümiti özi muxbirlar ömiki teshkillep tibetke ewetti

Fransiye agéntliqining 25 ‏- mart küni jenwedin xewer qilishiche, yéqinda asiyada hökümetke béqinmaydighan 65 teshkilat birleshken döletler teshkilatini tibet mesilisige köngül bölmidi, dep tenqid qilip, tibettiki kishilik hoquq weziyitini tekshürüsh üchün xelq'araliq ömek ewetishni jiddiy telep qilghan idi.

B b s ning béyjingdin bayan qilishiche, xitay dölet kabiniti uchur ishxanisi bügün tibette yüz bergen weqeni ziyaret qilish üchün bir muxbirlar ömiki teshkillep lxasagha ewetken. Xitay tashqi ishlar minisitirliqining bayanatchisi chin gangning éytishiche, bu muxbirlar ömiki lxasagha bérip üch kün ichide 'dalay guruhining qanunsiz unsurliri sadir qilghan urush, chéqish, bulash, ot qoyush herikitining delil -ispatliri 'ni we qachaqtiki qanunsiz unsurlarni axturush, tutush, basturush ehwalini körüp kélidiken. Xitay hökümiti özi teshkilligen bu muxbirlar ömikini 'chet'el uchur wastiliri' dep jakarlighan.

Xewerde bayan qilishiniche, xitay hökümiti oyushturghan bu 'muxbirlar ömiki' ge teklip qilin'ghan 30 neper muxbir asasen xongkongdiki simsiz téléwiziye istansisi, sumruq téléwiziye istansisi, mingpaw géziti, jenubiy xitay seherlik géziti, winxuy géziti'idin ibaret 5 orundin؛ teywendiki merkizi agéntliqi, dungsén xewerliri, birleshme xewer gézitidin ibaret 3 orundin tallap teklip qilin'ghan muxbirlar bolup, bularning ichide yene yérim aral téléwiziyisi, nhk qatarliq 9 orundin teklip qilin'ghan bir nechche kishimu bar. Emma xitay hökümitining b b s qatarliq erkin, musteqil uchur wastilirini bu ömekke teklip qilmighanliqi xelq'arada özgiche inkas peyda qildi. (Weli)