Хәлқара муһит қоғдаш тәшкилати ген қурулмиси өзгәртилгән гүрүч тоғрисида хитайни агаһландурди

Хәлқара муһит қоғдаш тәшкилати, җүмә күни ген қурулмиси өзгәртилгән гүрүчниң хитайда базарға селинғанлиқини агаһландуруп, хитай даирилирини тәдбир елишқа чақирди. Йешил тинчлиқ тәшкилатиниң тәкитлишичә, бу хил гүрүч бихәтәрлик җәһәттики капаләткә игә әмәскән.

Бирләшмә ахбарат агентлиқиниң хәвәр қилишичә, хәлқара йешил тинчлиқ тәшкилатидики тәкшүргүчиләр, гуаңҗовда мәзкур гүрүчниң қанунсиз базарға селинғанлиқини ашкарлиған. Йешил тинчлиқ тәшкилатиниң бир хадими, "тәҗрибә нәтиҗилири ген қурулмиси өзгәртилгән гүрүчниң инсанларға реаксийә қилидиғанлиқини көрсәтмәктә," дәп тәкитлиди. Йешил тинчлиқ тәшкилатиниң баянатчиси ши паңчоң, хитай һөкүмитиниң дәрһал тәдбир елишини тәләп қилған.

Йешил тинчлиқ тәшкилатиниң ашкарилишичә, мәзкур орган бу хил гүрүчни 4 - айда хитайниң хубей районида байқиған. Йешил тинчлиқ тәшкилати, ху бейда ген қурулмиси өзгәртилгән 14500 тонна гүрүч, 29 тонна шал уруқи байқиғанлиқини елан қилған.

Мәзкур тәшкилатниң баянатчиси, "бизниңчә буниңға қарши тәдбир алмаслиқ қобул қилғили болмайдиған мәсулийәтсизлик. Чүнки гүрүч хитайда әң муһим истимал мәһсулати," дәп тәкитлиди.

Йешил тинчлиқ тәшкилатиниң әскәртишичә, мәзкур орган хитайда истималчиларниң ген қурулмиси өзгәртилгән гүрүчни билмәй истимал қиливатқанлиқиға ишинидикән. Йешил тинчлиқ тәшкилати, бу хил гүрүчниң хитайда базарға селиниши хитайниң гүрүч експортиға тәсир көрситидиғанлиқини агаһландурди.(Әркин)