Xelq'ara muhit qoghdash teshkilati gén qurulmisi özgertilgen gürüch toghrisida xitayni agahlandurdi

Xelq'ara muhit qoghdash teshkilati, jüme küni gén qurulmisi özgertilgen gürüchning xitayda bazargha sélin'ghanliqini agahlandurup, xitay da'irilirini tedbir élishqa chaqirdi. Yéshil tinchliq teshkilatining tekitlishiche, bu xil gürüch bixeterlik jehettiki kapaletke ige emesken.

Birleshme axbarat agéntliqining xewer qilishiche, xelq'ara yéshil tinchliq teshkilatidiki tekshürgüchiler, gu'angjowda mezkur gürüchning qanunsiz bazargha sélin'ghanliqini ashkarlighan. Yéshil tinchliq teshkilatining bir xadimi, "tejribe netijiliri gén qurulmisi özgertilgen gürüchning insanlargha ré'aksiye qilidighanliqini körsetmekte," dep tekitlidi. Yéshil tinchliq teshkilatining bayanatchisi shi pangchong, xitay hökümitining derhal tedbir élishini telep qilghan.

Yéshil tinchliq teshkilatining ashkarilishiche, mezkur organ bu xil gürüchni 4 - ayda xitayning xubéy rayonida bayqighan. Yéshil tinchliq teshkilati, xu béyda gén qurulmisi özgertilgen 14500 tonna gürüch, 29 tonna shal uruqi bayqighanliqini élan qilghan.

Mezkur teshkilatning bayanatchisi, "bizningche buninggha qarshi tedbir almasliq qobul qilghili bolmaydighan mes'uliyetsizlik. Chünki gürüch xitayda eng muhim istimal mehsulati," dep tekitlidi.

Yéshil tinchliq teshkilatining eskertishiche, mezkur organ xitayda istimalchilarning gén qurulmisi özgertilgen gürüchni bilmey istimal qiliwatqanliqigha ishinidiken. Yéshil tinchliq teshkilati, bu xil gürüchning xitayda bazargha sélinishi xitayning gürüch éksportigha tesir körsitidighanliqini agahlandurdi.(Erkin)