Béyjingda xitay déhqanlar namayish ötküzdi

Texminen 500 dek xitay déhqan jüme küni béyjingning shünyi rayonida namayish ötküzüp, béyjingdiki melum bir yer mülük tereqqiyat shirkiti igiliwalghan térilghu yerlerge qoshumche tölem puli tölep bérishni telep qildi.

Roytérs axbarat agéntliqining xewer qilishiche, namayishchilar béyjing xelq'ara mektipige ötidighan yollarni tosap sho'ar towlighan, qizil lozunkilarni asqan. Xewerlerge qarighanda namayishchilar buningdin ilgiri xitay qurulush da'irilirining aldida namayish qilip, küch körsetken

. Roytérs axbarat agéntliqining namyishchilardin neqil keltürüshiche, béyjingdiki tyanju dep atalghan bir yer mülük tereqqiyat shirkiti déhqanlarning nechche yüz mo yérini qanunsiz igiliwélip, heshemetlik a'ililer olturaq rayoni berpa qilghan. Xitaydiki chong shirketlerning déhqanlar we yaki sheher ahalisining olturaq öylirini, térilghu étizlirini özini xalighan bahada éliwélip , bu jaylargha chong kölemdiki qurulushlarni élip bérish xitayda köp uchraydighan ehwal.

Bir qanche ayning aldida Uyghur aptonom rayonining atush shehiride turushluq déhqanlarning yer mülkini béyjingdiki jongkén dep atalghan bir shirket mejburiy sétiwalghan. Sétishni ret qilghanlar ürümchigiche dawa qilip barghan bolsimu aqmighanidi. Uyghur aptonom rayonining re'isi ismayil tiliwaldi jongkén shirkitining bash mudirini qobul qilip, uning qeshqer we atushlarda yer- zémin, öy-mülük tereqqiyat sodisi bilen shughullinishgha yerlik da'irilerning maslishidighanliqini wede qilghan. (Erkin)