Хитай сақчилири чоңчиңдики топилаң мунасивити билән 40 адәмни қолға алди

Хитай сақчи даирилири пәйшәнбә күни, бу һәптиниң бешида чоңчиңда йүз бәргән чоң топилаң мунасивити билән аз дегәндә 40 адәмни қолға алғанлиқини билдүрди.Қолға елинғанларниң ичидә топилаңниң келип чиқишиға сәвәб болған кишиму бар икән.

Франсийә ахбарат агентлиқиниң хәвиригә қариғанда, дүшәнбә күни өзини ялғандин һөкүмәтниң юқири дәриҗилик әмәлдари дәп көрсәткән бир киши мевә базирида бир балиға зомигәрлик қилип, униңдин пул үндүрүшкә урунған вә балини урған.

Буни көргән хәлқ аммиси дәрһал һөкүмәт бинаси алдида қаршилиқ билдүрүп, намайиш өткүзгән, шундақла хәлқ аммиси тез көпийип, намайиш топилаңға айлинип кәткән. Кишиләр сақчи машинилирини өрүп от қойған һәм һөкүмәт бинасидики әслиһәләрни булап кәткән. Җәми 20 миңдәк шәһәр аһалиси буниңға қатнашқан.

Хәвәргә қариғанда, чоңчиң сақчи даирилири гәрчә вәзийәтниң нөвәттә контрол астиға елинғанлиқини билдүргән болсиму, бирақ нәқ мәйдандики бир қисим кишиләр намайишниң тар даиридә давам қиливатқанлиқини көрсәткән. Хәвәрдә ийтилишичә, бу вәқә хәлқ билән компартийә әмәлдарлири оттурисида чоңқур зиддийәт барлиқини әкс әттүридикән. (Арзу)