Хитай сот даирилири иш ташлашқа қатнашқан бәш ишчини түрмигә ташлиди


2004.10.28

Хитайдики бәш нәпәр ишчи завут игилириниң иш һәққини вақтида бәрмигәнлики вә хизмәт шараитиниң начарлиқиға қаршилиқ билдүргәнлики үчүн җазаға һөкүм қилинди.

" Хитайдики әмгәкчиләр һоқоқини күзитиш тәшкилати" ниң билдүришичә, бу йил 4 - айда гуаңдуң дуңвәндики бир аяқ завутида ишләйдиған нәччә миңлиған ишчи хизмәт шараитиниң начарлиқи, иш һәққиниң төвәнлики вә вақтида берилмигәнликигә қарши наразилиқ намайиши өткүзгән.

Намайиштин кийин, йәрлик җамаәт хәвпсизлик органлири завут тәминлигән тизимликкә асасән 40 нәччә адәмни қолға алған. Дуңвән шәһәрлик сот мәһкимиси алдинқи күни буларниң ичидики бәшини " мал мүлүккә зиян селиш" җинайити билән әйипләп, үч йилдин үч йерим йилғичә қамақ җазасиға һөкүм қилған. Җазаға һөкүм қилинғанларниң әң кичики 16 яшлиқ бир қиз икән.

Бу бәш нәпәр ишчиниң адвукати гавниң фирансийә ахбарат агентлиқиға билдүришичә, гәрчә қанунда сот мәһкимисиниң қарарини җавабкарларниң адвукатиға уқтуриши шәрт болсиму, бирақ дуңвән сот мәһкимиси буниңға әмәл қилмиған. У ишчиларниң җазаға һөкүм қилинған хәвирини тор бети арқилиқ игилигән. (Арзу)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.