Хитайдики бихәтәрлик хадимлири наразилиқ һәрикәтлиригә мувапиқ муамилә қилишқа чақирилди


2004.12.27
Share on WhatsApp
Share on WhatsApp

Өткән һәптә ахирида хитайниң гуаң доң өлкисиниң доңгуән наһийисидә ишчилар билән наһийидики бихәтәрлик хадимлири оттурисида йүз бәргән тоқунушлардин кейин, хитай җамаәт хәвпсизлик министири җо хоңкаң бихәтәрлик хадимлирини, топилаң вә наразилиқ һәрикәтлиригә мувапиқ муамилә қилишқа чақирди.

Йеқиндин бири хитайда сақчилар билән ишчи вә деһқанлар оттурисида җидди тоқунушлар йүз бәрмәктә. Өткән һәптә ахирида гуаң доңниң доггуән наһийисидә йүз бәргән тоқунушларниң көлими чоң болуп, хоң коңда чиқидиған бир гезитиниң йәкшәнбә күнидики хәвиригә қариғанда, йәрлик сақчи даирлириниң начар муамилисигә қарши наразилиқ намайиши өткүзгән 50000 әтрапида ишчи аманлиқ сақлаш қисимлири билән тоқунушқан. Тоқунуш җәрянида намайишчилар сақчиларға таш вә кесәк етип, төт сақчи машинисини пачақлап ташлиған.

Ройтирс агентлиқиниң хәвәр қилишичә, хитай җамаәт хәвпсизлик министири җамаәт хәвпсизлик органлиридин тоқунушларда вә кәң көләмлик наразилиқ һәрикәтлириниң алидини елишта ишлитидиған усуллирини яхшилишини тәләп қилди.

Мушу айниң өзидила хитайниң шәнши өлкисидә түрмидики кәсипдашлирини қутқузушқа урунған икки йүз ишчи билән сақчилар оттурисида йүз бәргән тоқунушта икки сақчи өлди. Гуаңшида болса, 10 миңдин артуқ намайишчи билән аманлиқ сақлаш қисимлири оттурисида тоқунушлар йүз бәрди.

Өктәбир ейида болса, хитай һөкүмити туңганлар билән хәнзулар оттурисида йүз бәргән тоқунушлардин кейин, хенән өлкисниң бир қисмида һәрбий һаләт елан қилған. Туңганлар билән хәнзулар арисидики җидәлдә аз дегәндә йәттә киши өлгән вә 42 киши яриланған иди. (Қанат)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.