Xitayda qozghalghan küch ulap ashliq élan qilish herikiti 20 ‏- künige qedem qoydi

Béyjingdiki kishilik hoquq himayichisi, adwukat gaw jimu teripidin qozghitilghan küch ulap ashliq élan qilish herikiti bügün 20 ‏- künige qedem qoydi.

Istansimizning bu heqte igiligen eng yéngi uchurilirigha qarighanda, bu heriket, pütün yer shari boyiche az dégende 77 teshkilatning hemde nechche minglighan shexislerning qollishigha érishken.

Béyjingda, mezkur küch ulap ashliq élan qilish herikitige qatnashqan kishilerning bir qisimi qamalghan, yene bir qisimi bolsa nazaret astigha élin'ghan bolup,adwukat gaw jimuning ishxanisining etrapi saqchilar bilen tolup ketken we puqrache kiyin'gen saqchilar gaw jimu bilen körüshmekchi bolghanlargha tosqunluq qilghan.

Ikki kün burun, adwukat gaw puqrache kiyin'gen saqchilar bilen jidelleshken, gawning éytishiche, u türlük yollar arqiliq tashqi dunyadin kelgen pikir we tewisiyilerni tapshurwalghan, bezi mütexessisler uning, bu heriketni derhal toxtitishini telep qilghan, emma köpligen kishiler yenila bu pa'aliyetke qatnishidighanliqini, ezalar sanini köpeytishke hesse qoshudighanliqini bildürgen.

Gaw jimuning tekitlishiche, u xitayning her qaysi jayliridin bu heriketke eza bolush toghruluq iltimaslarni tapshuruwalghan, buning ichide bolupmu yünnen bilen xéylongjyangdin kelgen iltimaslar köp sanliqni igileydiken.

2 ‏- Ayning 4 ‏- küni, gaw jimuning teshebbüsi bilen, xitaydiki 370 ke yéqin kishi, hökümetning kishilik hoquq qoghdughuchilirigha ziyankeshlik qilish qilmishliri üstidin naraziliq bildürüp, küch ulap ashliq élan qilish herikitini qozghighan idi. (Eqide)