Sherqi xitayda namayishchi amma bilen saqchilar arisida keskin toqunush boldi

Birleshme agéntliqining 22 ‏- mart béyjingdin bergen xewiridin melum bolushiche, sherqi xitayda minglighan amma öz yézisining sheherge qoshulup kétishige qarshi naraziliqlirini bildürüp namayish qilghan. Namayish jeryanida xitay saqchiliri bilen namayishchi amma arisida keskin toqunushlar bolghan.

Namayish charshenbe küni jyangshi ölkisining guyshi yézisida yuz bergen bolup namayishchilar sherqi xitaydiki bir muhim tömür yolni tosuwalghan. Toqunush jeryanida saqchilar namayishchilarni qoghlighan we yash aqquzush bombisi atqan.

Xitay axbarat wasitilirining bergen melumatida namayishchilarning sani ikki yüz etrapida dep éytilghan bolsimu, emma namayish shahidliri namayishichilarning nechche on minggha yétidighanliqini bildürgen. Ularning éytishiche, saqchilar az bolghandimu 40 ademni yarilandurghan, shuning bilen ghezeplen'gen amma mashinilarni örüshni bashlighan.

Yéqinqi yillardin béri, xitayda namayishlarning sani körünerlik örligen bolup, xitay jama'et xewpsizlik ministirliqining sanliq melumatigha qarighanda 2005 ‏- yilida teshwiqat waraqchisi chaplash, namayish qilish qatarliq weqeler 87 ming qétim yüz bergen. Bu 2004 - yilidikidin 6.6 Pirsent we 2003 yilidikidin 50 pirsent örligen. (Jüme)