سىچۈەن ئۆلكىسىدە مىڭدىن ئارتۇق ئامما ۋە ئوقۇغۇچىلار بىرلىكتە نامايىش قىلدى


2007.06.18
Share on WhatsApp
Share on WhatsApp

غەربىي جەنۇبى خىتايدا مىڭدىن ئارتۇق ئامما ئۆلۈپ كەتكەن ئوقۇغۇچىنىڭ جەسىتىنى كۆتۈرۈپ, ساقچىخانا ئالدىغان توپلىشىپ، "ساقچىلار بۇ ئوقۇغۇچىنىڭ ئۆلۈشىگە سەۋەپ بولغان لۈكچەكنى قانات ئاستىغا ئالدى" دەپ نامايىش قىلدى. نامايىش جەريانىدا ساقچىلار بىلەن نامايىشچى ئامما ئارىسىدا توقۇنۇش يۈز بەردى.

خوڭكوڭغا جايلاشقان بىر كىشىلىك ھوقۇق ۋە دېموكراتىيە مەركىزى، ۋاڭ چىياڭ ئىسىملىك 15 ياشلىق بۇ ئۆسمۈرنىڭ 13 -ماي زىيانكەشلىككە ئۇچرىغانلىقىنى ئۇقتۇرغان. مەلۇم بولۇشىچە، سىچۈەن ئۆلكىسى تەۋەسىدىكى جيۇلوڭ يېزىسى ساقچخانىسىنىڭ باشلىقى بۇ ئوقۇغۇچىنىڭ ئۆلۈمىگە سەۋەبچى بولغان جىنايەت گۇماندارىنىڭ تاغىسى ئىكەن.

بۇ مەركەزنىڭ بىلدۈرۈشىچە، مىڭدىن ئارتۇق يەرلىك ئامما ۋە ئوقۇغۇچىلار بىرلىكتە، 17- ماي كۈنى ۋاڭنىڭ جەسىتىنى كۆتۈرۈپ ساقچىخانا ئالدىدا نامايىش قىلغان ۋە ساقچىلار بىلەن توقۇنۇشقان. توقۇنۇشتا بىرنەچچە نامايىشچى يارىلانغان، 30غا يېقىن ئادەم قولغا ئېلىنغان ۋە جيۇ لوڭ ساقچىخانىسىدىكى بەش ساقچى ۋە ساقچى باشلىقى توختىتىپ قويۇلغان.

بىرلەشمە ئاگېنتلىقىنىڭ خەۋىرىگە قارىغاندا، ۋەقە يۈز بەرگەن پەيتتە، يەرلىك ھۆكۈمەت ۋەقە ھەققىدىكى خەۋەرنى قامال قىلىش ئۈچۈن تېلېفۇن ۋە ئىنتېرنېت سىم يوللىرىنى ئۈزۈۋەتكەن بولغاچقا ۋاڭنىڭ ئۆلۈش سەۋەبى ھەم نامايىشنىڭ جەريانى ھەققىدە تەپسىلىي مەلۇمات ئېلىشقا ئىمكان بولمىغان.

تېخى مۇشۇ ئاينىڭ بېشىدىلا، خېنەن ئۆلكىسىنىڭ جېڭجۇ شەھىرىدە مىڭلىغان ئوقۇغۇچى بازار باشقۇرغۇچىلارنىڭ بىر قىز ئوقۇغۇچىنى ئۇرۇشى سەۋەبىدىن ماشىنىلارنى ئۆرۈپ نامايىش قىلغان ئىدى. يېقىندىن بۇيان خىتاي جەمئىيىتىدە ھەر خىل شەكىلدىكى نارازىلىق نامايىشلىرى كۆپىيىشكە باشلىدى. (جۈمە)

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.