Sichüen ölkiside mingdin artuq amma we oqughuchilar birlikte namayish qildi

Gherbiy jenubi xitayda mingdin artuq amma ölüp ketken oqughuchining jesitini kötürüp, saqchixana aldighan topliship, "saqchilar bu oqughuchining ölüshige sewep bolghan lükchekni qanat astigha aldi" dep namayish qildi. Namayish jeryanida saqchilar bilen namayishchi amma arisida toqunush yüz berdi.

Xongkonggha jaylashqan bir kishilik hoquq we démokratiye merkizi, wang chiyang isimlik 15 yashliq bu ösmürning 13 -may ziyankeshlikke uchrighanliqini uqturghan. Melum bolushiche, sichüen ölkisi tewesidiki jyulong yézisi saqchxanisining bashliqi bu oqughuchining ölümige sewebchi bolghan jinayet gumandarining taghisi iken.

Bu merkezning bildürüshiche, mingdin artuq yerlik amma we oqughuchilar birlikte, 17- may küni wangning jesitini kötürüp saqchixana aldida namayish qilghan we saqchilar bilen toqunushqan. Toqunushta birnechche namayishchi yarilan'ghan, 30gha yéqin adem qolgha élin'ghan we jyu long saqchixanisidiki besh saqchi we saqchi bashliqi toxtitip qoyulghan.

Birleshme agéntliqining xewirige qarighanda, weqe yüz bergen peytte, yerlik hökümet weqe heqqidiki xewerni qamal qilish üchün téléfun we intérnét sim yollirini üzüwetken bolghachqa wangning ölüsh sewebi hem namayishning jeryani heqqide tepsiliy melumat élishqa imkan bolmighan.

Téxi mushu ayning béshidila, xénen ölkisining jéngju shehiride minglighan oqughuchi bazar bashqurghuchilarning bir qiz oqughuchini urushi sewebidin mashinilarni örüp namayish qilghan idi. Yéqindin buyan xitay jem'iyitide her xil shekildiki naraziliq namayishliri köpiyishke bashlidi. (Jüme)