Xitay hökümiti 12 saqchi we hökümet xadimini jazalidi

Xénen ölkisining merkizi jéngju shehiride xelqining saqchilargha qarshi isyani hökümetni, 12 saqchi we hökümet xadimini jazalashqa mejburlidi.

Ötken char shenbe küni jéngju shehirining kochilirida ushshaq tijaret we sétiqchiliq bilen shughulliniwatqan aliy mektep oqughuchisi bir qizning, bazar bashqurush xadimliri teripidin urulghanliqi, xelqning ghezibini qozghap, minglighan kishining bazar bashqurush xadimliri we saqchilargha hujum qilishini keltürüp chiqarghan we xelq bilen saqchilar otturisida qattiq toqunush yüzbergen idi.

Xewerlerge qarighanda, bazar bashqurush xadimliri oqughuchi qizni urup , chishlirini töküwetken.

Xitay kündilik gézitining jüme küni xewer qilishiche, bu weqeler sewebidin hökümet bazar bashqurush guruppisining ikki bashliqini wezipisidin élip tashlap, 6 saqchi xadimini qolgha alghan.

Xitayda naraziliq heriketliri we xelq bilen saqchilar otturisidiki toqunushlar kündilik bir ishqa aylan'ghan bolup, xitay jama'et xewipisizlik minsitirliqining bildürüshiche, 2005‏- yili xitayda 87000 qétim naraziliq herikiti yüz bergen. Bu 2003‏- yili yüz bergen naraziliq heriketlirige sélishturghanda, xitayda naraziliq heriketlirining % 50 köpeygenlikini körsitidiken.(Ömer qanat)