Хитайда наразилиқ һәрикәтлири изчил түрдә йүз бәрмәктә

Хоңкоңда чиқидиған " нур" гезитиниң хәвиригә қариғанда хитайниң шенҗен шәһиридики " фейхуаң " електир әсваблири завутиниң нәччә миңлиған ишчилири, завут даирилириниң иш көлимини ашуруп, әксичә маашни өстүрмәслик қилмиши үстидин наразилиқ билдүрүп, чаршәнбә күнидин буян иш ташлаш һәрикити елип барған.

Хәвәрдин мәлум болушичә, һөкүмәт буниңға қарита нәччә йүзлигән сақчи вә қораллиқ әскәрлирини ишқа селип вәқә йүз бәргән мәйданда чарлаш елип барған. Нәтиҗидә, ишчилар билән сақчилар оттурисида тоқунуш йүз берип, көп адәм яриланған , 5 нәпәр ишчи қолға елинған. Нәқ мәйданни көргүчиләрниң билдүрүшичә, ишчиларниң наразилиқ һәрикити қатнашқа еғир тосқунлуқ елип кәлгән.

Бу арида йәнә " фейхуаң " завутиниң тармиқидики йәнә қол телефони ясаш завутиниң нәччә миң ишчиси, охшаш сәвәб билән уда икки күн иш ташлиған. Һөкүмәт қораллиқ қисим әскәрлирини һәрикәткә селип қатнаш тохтап қелишниң алдини алған.

Хитайниң һәрқайси җайлирида иш түзүмигә қарши наразилиқ һәрикәтлири давамлиқ дегүдәк йүз берип туриду. Хитай һөкүмити бу хил һәрикәтләрниң алдини елиш үчүн барлиқ күчини ишқа салмақта, болупму олимпик мусабиқисиға җиддий тәйярлиқ қиливатқан хитай хәлқниң наразилиқ һәрикәтлиридин мәйданға келидиған сәтчиликләрниң йүз беришидин қаттиқ әндишә қилиду.

Чүнки, хәлқара кишилик һоқуқ тәшкилатлири хитайниң кишилик һоқуқ мәсилисини қаттиқ әйибләп, хәлқара җәмийәттин бейҗиңниң олимпик мусабиқиси өткүзүшигә қарши байқут елан қилишини тәләп қилди. (Әқидә)