Xu jintaw téximu köp néfitqa érishish üchün rusiye bilen qazaqistan'gha barmaqchi

Xitay dölet re'isi xu jintaw dölitide künsayin éshiwatqan énérgiye éhtiyaji sewebidin téximu köp xam néfit we tebi'iy gazgha érishish üchün mushu heptining ichide rusiye bilen qazaqistan'gha ziyaretke barmaqchi.

Roytérs agéntliqining xewirige qarighanda, xitay ötken yili dölet ichide ishlepchiqirilghan néfit bilen özining énérgiyige bolghan éhtiyajining aran 50 nechche pirsentini qanduralighan. Shunga xitay nöwette néfit importigha jiddiy éhtiyajliq bolmaqta.

Uning üstige xitay hökümiti néfit istratégiyisini rusiye we ottura asiya döletlirige burap, özining amérikining tesiri küchlük bolghan ottura sherq néfitigha tayinip qélishigha xatime bérishni meqset qilghan.

Nöwette xitay bilen yaponiye her ikkilisi, dunya boyiche ikkinchi chong néfit ishlepchiqarghuchi bolghan rusiyining tebi'iy gaz turubisini öz döletlirige tutashturushni talishiwatqan bolup, rusiye gerche deslep bu turubini yaponiyige tutashturup bérishke qoshulghan bolsimu, emma hazirghiche téxi éniq bir qarar chiqarmidi.

Xitay hökümiti yene, qazaqistan bilen bolghan néfit alaqisigha köp étibar bergen bolup, qazaqistan hökümiti xitaygha tutishidighan tebi'iy gaz turubisi yasashqa qoshulghan idi. Shundaqla bu turuba qurulushi mushu yilning ichide pütmekchi. (Peride)