Хитай нефитлигиниң җилиндики хемийә-санаәт завутида партлаш йүз бәрди


2005.11.13

Йәкшәнбә күни хитай нефитлигиниң җилиндики бир хемийә-санаәт завутида партлаш йүз берип, 50 нәччә кишиниң ярилинишини кәлтүрүп чиқарған һәмдә бу сәвәптин завут әтрапидики 10 миңдин ошуқ киши тарқақлаштурулған. Лекин һазирғичә өлгәнләр байқалмиған.

Партлаш вәқәси йәкшәнбә күни чүштин кейин хитай нефитлигиниң җилиндики 101 - хемийә-санаәт завутида йүз бәргән болуп, партлаш һәтта 200 метир йирақлиқтидики аилиликләр бинасиниң деризилириниму пүтүнләй чеқивәткән. Шундақла партлаштин келип чиққан қоюқ ис-түтәк нәччә йүз метир йирақлиқтики җайларниму қаплап кәткән.

Мунасивәтлик орунлар бу завутта пүтүнләй хемийилик суюқлуқлар болғанлиқи үчүн, бу йәрдә йәнә партлаш йүз беришидин вә зәһәрлик газларниң адәмләргә зиян йәткүзишидин әндишә қилип, бу әтраптики 10 миңға йеқин хәлқни өйлиридин көчүрүп, башқа җайларға тарқақлаштурған.

Гәрчә һазир дохтурханида 50 нәччә киши давалиниватқан болсиму, лекин һөкүмәт даирилири партлаш районини пүтүнләй қамал қиливалғачқа, йәнә қанчилик адәмниң яриланғанлиқи техичә ениқланмиған. Һазир бу партлашниң келип чиқиш сәвәбиму техи айдиң әмәс. (Пәридә)

© 2005 Radio Free Asia

Мунасивәтлик мақалилар

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.