Хитай непалға бир дохтурхана қуруп бәрмәкчи

Непал баш министири чаршәнбә күни пайтәхт катмандода, хитай бу йәрдә қуруп бәрмәкчи болған бир дохтурханиниң ул тешини ятқузди. Һәмдә буни "хитай - непал достлуқиниң символи болғуси" дәп көрсәтти.

Франсийә ахбарат агентлиқиниң хәвиридә көрситилишичә, баш министир шер баһадур дуба 136 кариватлиқ бу дохтурханиниң 2006- йилдин бурун пүтүшини үмид қилидиғанлиқини билдүрди.

2001- Йили хитайниң сабиқ баш министири җу роңҗи непални зиярәт қилған мәзгилдә катмандода 35 милйон америка доллири сәрп қилип бу дохтурханини қуруп беришкә вәдә бәргән болуп, бу асаслиқи непалдики 80 миң мәмурий хадим үчүн ишлитилидикән.

Хитайниң непалдики әлчиси сун хепиң, непални "яхши достимиз" дәп тәсвирләп, бу дохтурханиниң икки дөләт мунасивитини техиму күчәйтишкә түрткә болишини үмид қилидиғанлиқини билдүрди.

Хитай билән непал оттурисидики мунасивәткә уйғурлар йеқиндин көңүл бөлүватқан болуп, 2002 - йили непал һөкүмитиниң бирләшкән дөләтләр тәшкилати тәрипидин панаһлиқи қобул қилинған 3 нәпәр уйғур сиясий мусапирни хитайға қайтуруп бериши, уйғурлар вә хәлқара җәмийити тәрипидин күчлүк әйибләнгән иди. Чүнки хитай һөкүмити бу уйғурларни еғир җазалиған һәтта арисидики ширәли исимлик бир уйғур яшни етип ташлиған иди. (Пәридә)