Xitay népalgha bir doxturxana qurup bermekchi

Népal bash ministiri charshenbe küni paytext katmandoda, xitay bu yerde qurup bermekchi bolghan bir doxturxanining ul téshini yatquzdi. Hemde buni "xitay - népal dostluqining simwoli bolghusi" dep körsetti.

Fransiye axbarat agéntliqining xewiride körsitilishiche, bash ministir shér bahadur duba 136 kariwatliq bu doxturxanining 2006- yildin burun pütüshini ümid qilidighanliqini bildürdi.

2001- Yili xitayning sabiq bash ministiri ju rongji népalni ziyaret qilghan mezgilde katmandoda 35 milyon amérika dolliri serp qilip bu doxturxanini qurup bérishke wede bergen bolup, bu asasliqi népaldiki 80 ming memuriy xadim üchün ishlitilidiken.

Xitayning népaldiki elchisi sun xéping, népalni "yaxshi dostimiz" dep teswirlep, bu doxturxanining ikki dölet munasiwitini téximu kücheytishke türtke bolishini ümid qilidighanliqini bildürdi.

Xitay bilen népal otturisidiki munasiwetke Uyghurlar yéqindin köngül bölüwatqan bolup, 2002 - yili népal hökümitining birleshken döletler teshkilati teripidin panahliqi qobul qilin'ghan 3 neper Uyghur siyasiy musapirni xitaygha qayturup bérishi, Uyghurlar we xelq'ara jem'iyiti teripidin küchlük eyiblen'gen idi. Chünki xitay hökümiti bu Uyghurlarni éghir jazalighan hetta arisidiki shir'eli isimlik bir Uyghur yashni étip tashlighan idi. (Peride)