خىتاي نوپۇس كۆپىيىشنىڭ ئېغىر بېسىمىغا دۇچ كېلىۋاتىدۇ


2007.01.12

خىتاي دائىرىلىرى پەيشەنبە كۈنى دوكلات ئېلان قىلىپ، خىتاي نوپۇسىنىڭ 2033-يىلى بىر مىليارد 500 مىليونغا يېتىدىغانلىقىنى ۋە بۇ خىتاينىڭ ئىجتىمائىي مۇقىملىقى، ئىقتىساد، مۇھىت ۋە تەبئىي بايلىققا ئېغىر بېسىم شەكىللەندۈرىدىغانلىقىنى بىلدۈردى.

دوكلاتتا، بۇ دېگەنلىك كۆچمەن ئىشچىلارنىڭ تېخىمۇ كۆپىيىدىغانلىقى، ئەر - ئاياللار نوپۇسىدىكى تەڭپۇڭسىزلىقنىڭ ئېغىرلىشىدىغانلىقى شۇنداقلا ياشانغانلار نوپۇسىنىڭ كۆپىيىدىغانلىقىدىن دېرەك بېرىدۇ، دېگەنلىكتۇر، دەيدۇ.

دوكلاتتا ئەسكەرتىشىچە، خىتايدا 15ياشتىن 64 ياشقىچە بولغان خىزمەت يېشىدىكى نوپۇس 2016 - يىلى بىر مىليارد 10 مىليونغا يېتىپ، خىتايدا خىزمەت تېپىش، مائارىپ ۋە ئىجتىمائىي خىزمەت ساھەسىدە زور مەسىلە پەيدا قىلىدىغانلىقىنى ئەسكەرتتى. ياشانغانلارنىڭ سانى ھازىرقى 143 مىليوندىن 2040 - يىلى430 مىليونغا يېتىپ، دۆلەتنىڭ پىنسىيە ۋە ئىجتىمائىي سالامەتلىك سېستىمىسى ئېغىر رىقابەتكە دۇچ كېلىدىغانلىقىنى ئاگاھلاندۇردى.

خىتاي مەملىكەتلىك نوپۇس ۋە پىلانلىق تۇغۇت كومىتېتى تەرىپىدىن ھازىرلانغان دوكلاتتا، 2020 - يىلغىچە خىتايدا توي قېلىش يېشىدىكى 30 مىليون ياشنىڭ خوتۇن تاپالمايدىغانلىقىنى ۋە بۇ ئەھۋال خىتايدا ئىجتىمائىي مۇقىمسىزلىق ۋەزىيىتى يارىتىدىغانلىقىنى بىلدۈرمەكتە.

دوكلاتتا ئەسكەرتىشىچە، خىتايدا 2005 -يىلى ھەر 100 قىز بوۋاققا 118نەپەر ئوغۇل بوۋاق توغرا كەلگەن. گۇاڭدوڭغا ئوخشاش بەزى جايلاردا بولسا ھەر 100 قىز بوۋاققا 130 ئوغۇل بوۋاق توغرا كېلىۋاتقانلىقىنى بىلدۈردى. دوكلاتتا خىتاي نوپۇسىنى 2020 - يىلغىچە بىر مىليارد 450 مىليون ئەتراپىدا كونترول قىلىش، 9 يىللىق مەجبۇرى مائارىپ تۈزۈمىنى 2010 -يىلغىچە ئومۇملاشتۇرۇپ بولۇش شۇنداقلا يېزا - كەنتلەردە ئىجتىمائىي سۇغۇرتا سىستېمىسىنى قۇرۇپ چىقىش تەلەپ قىلىنغان. (ئەركىن)

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.