Olimpik qurulushida yéridin ayrilghan déhqanlar namayish qilghanliqi üchün tutqun qilindi

Xitay saqchiliri charshenbe küni olimpik qurulushida yéridin ayrilip qalghanliqi üchün namayish ötküziwatqan déhqanlarning arisidin ikki kishini tutup ketken.

Amérika birleshme agéntliqining bildürishiche, bu ikki kishi li shibo we jang gochinglar bolup, li shiboning ayali mezkur agéntliqqa, charshenbe küni 10 dek saqchining déhqanlar ikki aydin béri namayish qiliwatqan jaygha kélip, bu ikki kishini bashta resimge tartiwélip, andin ularni élip ketkenlikini bildürgen.

Lining ayali jing chyuwén yene, saqchilarning ularni qeyerge élip ketkenlikidin xewer tapalmighanliqini, gerche etraptiki bir qanche saqchixanilargha téléfon échip sürüshte qilghan bolsimu, emma hazirghiche ularning iz-dériki tépilmighanliqini bildürdi.

Béyjing sheher ichige 30 kilométir kélidighan bu yézidiki minggha yéqin déhqan bu yil 6 - aydin bashlap namayish qiliwatqan bolup, ular hökümetning ularni mejburiy köchüriwetkenlikige narazi bolghan hemde hökümettin tölem telep qilghan.

Béyjing hökümiti bu déhqanlar olturaqlashqan rayon'gha olimpik tenheriket yighinining su tenterbiyisi üchün qurulush salidighan bolup, hökümet da'iriliri bu jaylarning yéziliq hökümetke tewe ikenlikini, shunga shexslerge héchnéme bérilmeydighanliqini bildürgen.

Xitayda yéqinqi bir nechche yillardin buyan olimpik meydani qurulushi sewebidin yer igilirining naraziliq namayishliri ewj aldi. Shundaqla nöwette xitay hökümiti , yüksek insanperwerlikke ündeydighan xelq'ara olimpik yighinining xelqqe ziyan salghan asasta ötküzülmesliki heqqide xelq'araning bésimigha uchrimaqta. (Peride)