Бейҗиң олимпик қурулушиниң муавин рәһбири хиянәтчилик сәвәбидин тәкшүрүлди


2006.06.23
Share on WhatsApp
Share on WhatsApp

Бейҗиң шәһириниң муавин шәһәр башлиқи лю җихуа хиянәтчиликкә четилип қелиш сәвәбидин вәзиписидин қалдурулғандин кейин, бейҗиң олимпик қурулуши баш қараргаһиниң муавин рәһбири җин йән, мәркизи интизам тәкшүрүш комитети тәрипидин тәкшүрүлүшкә башлиған.

Хоңкоң мәтбуатлириниң ашкарилишичә, җин йән бу йил 5 - айниң оттурилири бир вәкилләр өмикини башлап шяменда тәкшүрүш елип барғандин кейин аммиви сорунларда көрүлмигән. Вәзийәттин хәвәрләр әрбаплар җин йәнниң тәкшүрүлүши лю җихуаниң хиянәтчилик дилоси билән мунасивәтлик болуши мумкин.

Көзәткүчиләр, хиянәтчилик билән әйиблинип вәзиписидин қалдурулған лю җихуани партийә ичи сияси күрәшниң қурбани, дәп қаримақта. Көзәткүчиләрниң бу пәризи тоғра болса лю җихуа партийә ичидики сияси күрәшниң бирдин бир қурбани әмәс.

Буниң алдида уйғур аптоном райониниң муавин рәиси аман һаҗи хиянәтчилик билән әйиблинип қолға елинған вә 12 йиллиқ қамақ җазасиға һөкүм қилинған. Көзәткүчиләр, уйғур аптоном райони партикоминиң секретари ваң лечүән билән "пәвқулладә йеқин мунасивти бар", дәп қаралған вә униң изчил "махтишиға сазавәр" болуп кәлгән аман һаҗини ваң лечүәнниң қурбаниға айланди, пәрәз қилишмақта иди.

Аман һаҗиниң канадада яшайдиған иниси илшат һаҗи бейҗиңда қолға елинғандин кейин өлүки аилисигә тапшуруп берилгән вә дәрһал көмүветиш тәләп қилинған иди.

Игиллишимизчә, лю җихуа вәзиписидин қалдурулғандин кейин, бейҗиңдики мәшһур йәр - мүлк содигири вә шавчуаң гуруһиниң баш мудири лю шавгуаң мәркизи интизам комитети тәрипидин елип кетилип тәкшүрүлгән. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.