Béyjing, olimpik yighinining bixeterliki üchün chet'eller bilen hemkarlishidighanliqini élan qildi

Béyjing saqchi idarisi, 2008‏- yilliq olimpik tenheriket yéghini jeryanida térrorluq hujumliri élip bérilishining aldini élish üchün, chet'el bixeterlik küchliri bilen hemkarlishish meqsitide yéngi bir bölüm qurdi.

Roytrés agéntliqining xewer qilishiche, béyjing olimpik bixeterlik idarisining bashliqi chang wiy düshenbe küni ötküzgen muxbirlarni kütüwélish yighinida, 20 aydin kéyin ötküzülidighan olimpik tenheriket yighinining bixeter ötküzülüshige kapaletlik qilish üchün hökümetning her türlük tedbir alidighanliqini bildürgen. Emma u olimpik tenheriket yighinigha oxshash chong tenheriket yighinlirining ötmüshte xelq'ara térrorchiliq teshkilatlirining nishani bolghanliqini eskertip, bügünki dunyaning tinch bir dunya emesliki hemimizge melum. Mushu sewebtin kishilerning bixeterlikini qoghdash üchün biz herqandaq tehditni yoqitidighan tedbirlerni alimiz, dégen.

Olimpik tenheriket yighinini tinch ötküzüsh xelq'ara jem'iyetning ortaq nishani ikenlikini tekitligen béyjing olimpik bixeterlik idarisining bashliqi chang wiy, xelq'ara jem'iyet bilen hemkarlashmay bu nishan'gha yétish mumkin emes, dédi.

U 2007 ‏- yilidiki teyyarliqlarning nahayiti muhim ikenlikini tekitlep, bu yil 26‏- nöwetlik olimpik tenheriket yéghini üchün sinaq teriqiside élip bérilidighan pa'aliyetler, hökümetning bixeterlik tedbirlirining yéterlik bolup- bolmighanliqini bahalashta muhim rol oynaydu, dégen.

Uzun yillardin béri Uyghur élide atalmish térrorluq pa'aliyetliri heqqide uchur bermigen xitay hökümiti, ötken hepte pamir igizlikide bir térrorluq lagirigha hujum qilip 18 kishini öltürgenlikini bildürüp, dunya jama'etchilikining diqqitini qaytidin bu mesilige tartishqa tirishti.

Lékin xelq'ara kishilik hoquq teshkilatliri xitay hökümitini xelq'ara térrorluqqa qarshi urushni bahane qilip, Uyghurlarning xitay hakimiyitige bolghan naraziliqini basturushqa tirishiwatidu dep, eyiblimekte. (Qanat)