Kanada metbu'atlirida béyjing olimpik tenheriket yighinini bayqut qilish mesilisi munazire qilinmaqta

Kanadaning Hamilton Spectator gézitide élan qilin'ghan bir maqalida, kanada hökümiti xitay edliye da'irilirining kanada puqrasi Uyghur pa'aliyetchisi hüseyin jélilni muddetsiz qamaq jazasigha höküm qilghanliqigha, 2008‏- yili béyjingda ötküzülmekchi bolghan olimpik tenheriket yighinini bayqut qilish arqiliq jawab qayturushi kérekliki otturigha qoyulghan.

Jeremi wodli dundas teripidin élan qilin'ghan maqalida "tashqi ishlar ministiri péter makkay hüseyin jélilning muddetsiz qamaq jazasigha höküm qilin'ghanliqi munasiwiti bilen élan qilghan xétide "kanada hökümiti kishilik hoquqning xitaydiki weziyitidin qattiq endishe qilmaqta" dégen. Undaqta nime üchün u, tenheriketchilirini 2008‏- yilidiki béyjing olimpik ten heriket yighinini bayqut qilishqa chaqirmaydu?" déyilgen.

Béyjing olimpik tenheriket yighinini bayqut qilish üchün nurghun seweblerning mewjut ikenliki tekitlen'gen maqalida mundaq déyilgen: "höseyin jélil we bashqa pa'aliyetchilerning türmige tashlan'ghanliqi, mehbuslarning organlirining sétilghanliqi, tibetning ishghal qilin'ghanliqi we budda dinining basturulghanliqi, xitayning darfurdiki qirghinchiliq mesiliside sudanni qollighanliqi we xitay hökümitining ölüm jazasini heddidin tashqiri ishlitiwatqanliqi buninggha misal bolalaydu. Xitay bu mesililerning xitayning ichki ishi ikenlikini bayan qilishi mumkin. Lékin bu olimpik rohigha tégi- tektidin xilap mesililer. " (Qanat)