خىتاينىڭ نەزىرىدە كىشىلىك ھوقۇق تەشكىلاتلىرىنىڭ تەنقىدى "ئولىمپىكنى سىياسىيلاشتۇرۇش"


2007-05-18
Share

خىتاي تاشقىي ئىشلار مىنىستىرى ياڭ جېيچى، خەلقئارا كىشىلىك ھوقۇق تەشكىلاتلىرى ۋە غەرب دۆلەتلىرىنىڭ خىتاي كىشىلىك ھوقۇق خاتىرىسى ۋە سۇدان مەسىلىسىدىكى سىياسىتىگە قارىتىلغان تەنقىدلەرنى بېيجىڭ ئولىمپىك يىغىنىنى سىياسىيلاشتۇرۇشقا قارىتىلغان، دەپ قارايدىغانلىقىنى نامايەن قىلدى.

ياڭ جېيچى جۈمە كۈنى ئەنگىلىيە تاشقىي ئىشلار مىنىستىرى مارگارېت بېككېت خانىم بىلەن كۆرۈشكەندە، 2008 - يىلى ئۆتكۈزۈلىدىغان بېيجىڭ ئولىمپىك مۇسابىقىسىنى سىياسىيلاشتۇرۇش يولىدىكى ئۇرۇنۇشلارنىڭ چوقۇم مەغلۇپ بولىدىغانلىقىنى بىلدۈردى. ياڭ، مارگارېت بېررېت بىلەن ئۆتكۈزگەن سۆھبىتىدىن كېيىن مۇخبىرلارنى كۈتۈۋېلىپ، بېيجىڭ ئولىمپىك يىغىنىنى سۇداننىڭ دارفۇر رايونى ۋە باشقا مەسىلىلەر بىلەن باغلىماقچى بولۇش، ئولىمپىك مۇسابىقىسىنى سىياسىيلاشتۇرغانلىقتۇر، دەپ تەنقىدلىگەن.

ياڭ جېيچى، خىتاي ھۆكۈمىتى ۋە ئەمەلدارلىرىنىڭ سۇداندىكى ھەر قايسى تەرەپلەر بىلەن زىچ ئالاقە ئورنىتىۋاتقانلىقىنى ۋە مەسىلىنى تىنچ، سۆھبەت بىلەن ھەل قىلىشنى ئۈمىد قىلىدىغانلىقىنى بىلدۈردى. خەلقئارا جەمىيەتنىڭ خىتاي ھۆكۈمىتىدىن سۇدانغا بېسىم ئىشلىتىپ دارفۇردىكى ئىنسانپەرۋەرلىك كرىزىسىگە خاتىمە بېرىش چاقىرىقى بارغانچە كۈچەيمەكتە.

يېقىندا ئامېرىكا دۆلەت مەجلىسىنىڭ بىر قىسىم ئەزالىرى خۇ جىنتاۋغا خەت يېزىپ، ئەگەر خىتاي سۇدان مەسىلىسىدە سىياسىتىنى ئۆزگەرتمىسە، بېيجىڭ ئولىمپىك يىغىنىنى " ئىرقىي قىرغىنچىلىق مۇسابىقىسى" دەپ قارايدىغانلىقىنى ئاگاھلاندۇرغان. بۇنىڭدىن سىرت كىشىلىك ھوقۇق تەشكىلاتلىرى ئۇيغۇر، تىبەت، دىنىي گۇرۇھلار ۋە ئۆكتىچى زاتلار باستۇرۇشقا ئۇچراۋاتقان ۋەزىيەتتە، ئولىمپىك مۇسابىقىسىنى بېيجىڭدا ئۆتكۈزۈشنىڭ توغرىلىقىدىن گۇمانلىنىدىغانلىقىنى بىلدۈرمەكتە ئىدى. (ئەركىن)

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت