Хитайниң нәзиридә кишилик һоқуқ тәшкилатлириниң тәнқиди "олимпикни сиясийлаштуруш"

Хитай ташқий ишлар министири яң җейчи, хәлқара кишилик һоқуқ тәшкилатлири вә ғәрб дөләтлириниң хитай кишилик һоқуқ хатириси вә судан мәсилисидики сияситигә қаритилған тәнқидләрни бейҗиң олимпик йиғинини сиясийлаштурушқа қаритилған, дәп қарайдиғанлиқини намайән қилди.

яң җейчи җүмә күни әнгилийә ташқий ишлар министири маргарет беккет ханим билән көрүшкәндә, 2008 - йили өткүзүлидиған бейҗиң олимпик мусабиқисини сиясийлаштуруш йолидики урунушларниң чоқум мәғлуп болидиғанлиқини билдүрди. яң, маргарет беррет билән өткүзгән сөһбитидин кейин мухбирларни күтүвелип, бейҗиң олимпик йиғинини суданниң дарфур райони вә башқа мәсилиләр билән бағлимақчи болуш, олимпик мусабиқисини сиясийлаштурғанлиқтур, дәп тәнқидлигән.

яң җейчи, хитай һөкүмити вә әмәлдарлириниң судандики һәр қайси тәрәпләр билән зич алақә орнитиватқанлиқини вә мәсилини тинч, сөһбәт билән һәл қилишни үмид қилидиғанлиқини билдүрди. Хәлқара җәмийәтниң хитай һөкүмитидин суданға бесим ишлитип дарфурдики инсанпәрвәрлик кризисигә хатимә бериш чақириқи барғанчә күчәймәктә.

Йеқинда америка дөләт мәҗлисиниң бир қисим әзалири ху җинтавға хәт йезип, әгәр хитай судан мәсилисидә сияситини өзгәртмисә, бейҗиң олимпик йиғинини " ирқий қирғинчилиқ мусабиқиси" дәп қарайдиғанлиқини агаһландурған. Буниңдин сирт кишилик һоқуқ тәшкилатлири уйғур, тибәт, диний гуруһлар вә өктичи затлар бастурушқа учраватқан вәзийәттә, олимпик мусабиқисини бейҗиңда өткүзүшниң тоғрилиқидин гуманлинидиғанлиқини билдүрмәктә иди. (Әркин)