Бейҗиң олимпикида ишлитилиш үчүн қурулуватқан тиктак топ залиға от кәтти


2007.07.02
Share on WhatsApp
Share on WhatsApp

2 ‏- Июл дүшәнбә күни, 2008- йиллиқ бейҗиң олимпикида ишлитилиш үчүн қурулуп пүтүш алдида турған тиктак топ мәйданиға от кәтти. Әмма гуваһчилар вә һөкүмәт хадимлириниң ейтишичә, апәттин зәхмә йигүчиләр вә яки өлүм- йетим ишлири көрүлмигән.

Ройтерс агентлиқиниң бу һәқтики хәвиридә көрситилишичә, мәйдандин көтүрүлгән от ялқуни вә қоюқ ис-түтәкләр бейҗиң университетида қурулуватқан мәзкур бинаниң өгзисини бир алған. Бинаниң ғәрбий булуңи иста қаридап кәткән болуп, сақчиларниң билдүрүшичә, ярилиниш әһвали көрүлмигән.

Көлими 26 миң 900 квадрат метир келидиған бу тәнтәрбийә сарийиниң қурулуши 2005- йили сентәбирдә башланған болуп, келәр айда пүтүши пиланланған вә мушу йили декабирда олимпикниң синақ паалийити өткүзүлмәкчи иди.

Бейҗиң университети баянатчиси: "биз 12- айда өткүзилидиған синақ паалийитиниң тәсиргә учришини күтмәймиз" дәйду . Мәлум болушичә, бейҗиң университетида қурулуватқан тиктак топ мәйданиға 8 миң адәм сиғидикән.

Келәр нөвәтлик олимпик йиғини, 2008- йили авғустта бейҗиңда ечилиду . Әмма дуняниң һәрқайси җайлиридики кишилик һоқуқ тәшкилатлири, хитайниң олимпиккә саһибхан болуш салаһийити йоқ дәп қарап, хитайни кишилик һоқуқни яхшилашқа қистап кәлгән вә олимпикни байқут қилиш чақириқини оттуриға қойған иди.(Җүмә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.