ئولىمپىك مۇسابىقىسىدە نەق مەيداندىن بېرىلىدىغان ئۇچۇرلارغا توسقۇنلۇق قىلىنماسلىقى كېرەك

فرانسىيە ئاگېنتلىقىنىڭ بۈگۈن بېيجىڭدىن خەۋەر قىلىشىچە، خەلقئارا ئولىمپىك كومىتېتىنىڭ پىشقەدەم يېتەكچىسى كېۋىن گوسپېر 'بېيجىڭ ئولىمپىك مۇسابىقىسىدە نەق مەيداندىن بېرىلىدىغان تېلېۋىزىيە، رادىئو ئۇچۇرلىرى ھېچقانداق توسقۇنلۇققا ئۇچرىماسلىقى ۋە ئىنتېرنېت توسۇلماسلىقى كېرەك' دەپ تەكىتلىدى. گوسپېر ئەپەندى بۇ سۆزنى ئولىمپىكنى تەشكىللەش كومىتېتىنىڭ ئۈچ كۈنلۈك يىغىنىدا ئوتتۇرىغا قويغان.

گوسپېر ئەپەندى سۆزىدە، بۇنىڭدىن بۇرۇن خىتاينىڭ مەركىزى تېلېۋىزىيە ئىستانسىسىنىڭ نەق مەيداندىن بېرىلىدىغان ئۇچۇرلارغا چات كېرىۋېلىپ، نەق مەيداندىن ئېلىنغان ئۇچۇرلارنى ئادەتتە بىر نەچچە مىنۇت كېچىكتۈرۈپ، كېسىدىغاننى كېسىپ ياكى ئۇنىڭ ئورنىغا باشقىنى ئالماشتۇرۇپ ئاندىن ئېلان قىلىپ كېلىۋاتقانلىقىنى پاش قىلغان.

خەۋەردە بايان قىلىنىشىچە، ئولىمپىك كومىتېتى ئۇچۇر گۇرۇپپىسىنىڭ باشلىقى سۇن ۋېيجا ئەپەندىمۇ، خىتاي ھۆكۈمىتىنىڭ بۇلتۇر پۈتۈن دۇنياغا مۇخبىرلارنىڭ ئۇچۇر ئەركىنلىكىگە دەخل-تەرۇز قىلماسلىق ھەققىدە ۋەدە بەرگەنلىكىنى قايتا ئەسكەرتكەندىن كېيىن، 'خىتاي مەركىزى تېلېۋىزىيە ئىستانسىسىمۇ ئولىمپىكنىڭ ئۇچۇرلىرىنى يوللاش سېستىمىسىدا ئۆزىنىڭ ھېچقانداق رول ئوينىمايدىغانلىقىنى ئەستىن چىقارماسلىقى كېرەك' دەپ ئالاھىدە تەكىتلىگەن. (ۋەلى)