خىتاي ئارمىيىسى بېيجىڭ ئولىمپىك مۇسابىقىسىدا بىخەتەرلىكنى قوغداش خىزمىتىگە قاتنىشىدۇ


2007-06-29
Share

خىتاي دائىرىلىرى ئالاھىدە ھەربىي خىزمەت قىسىمى قۇرۇپ، 2008 - يىلى بېيجىڭدا ئۆتكۈزۈلىدىغان خەلقئارا ئولىمپىك مۇسابىقىسىنىڭ بىخەتەرلىك خىزمىتىگە قاتناشتۇرىدىغانلىقىنى ئېلان قىلدى. خىتاي مەتبۇئاتلىرىنىڭ خەۋىرىدە ئەسكەرتىشىچە، بۇ ئالاھىدە ھەربىي خىزمەت قىسىمى، قوراللىق ساقچىلار ۋە جامائەت خەۋپسىزلىك ئورگانلىرىنىڭ ئولىمپىك جەريانىدا تېررورچى ۋەقەلەر ياكى تاسادىپىي ھادىسىلەر يۈز بېرىشىدىن ساقلىنىپ، ئولىمپىكنىڭ بىخەتەرلىكىگە كاپالەتلىك قىلىش خىزمىتىگە ماسلاشماقچى ئىكەن.

بېيجىڭ ئولىمپىك يىغىنى ئامانلىقىنى قوغداش مەركىزىنىڭ مەسئۇلى تيەن يىشياڭ، پەيشەنبە كۈنى بېيجىڭدىكى چەتئەللىك ھەربىي دىپلوماتلارغا بېيجىڭ ئولىمپىك يىغىنى مۇرەككەپ بىخەتەرلىك ۋەزىيىتىگە دۇچ كېلىۋاتقانلىقىنى بىلدۈرگەن. ئۇ، ئالاھىدە ھەربىي خىزمەت قىسىمىنىڭ قۇرۇقلۇق، دېڭىز ۋە ھاۋا ئارمىيە قىسىملىرىدىن قۇرۇلىدىغانلىقىنى ۋە بۇ قىسىم تېررورچىلارنىڭ غەيرىي ئەنئەنىۋى قوراللىرىنىڭ بولۇپمۇ يادرو ۋە خىمىيىلىك قوراللىرىنىڭ ھۇجۇمىغا قارشى تۇرۇش ھەمدە ھاۋا، دېڭىز ۋە مۇسابىقە رايونىنىڭ ئەتراپىدىكى جايلارنىڭ بىخەتەرلىكى قاتارلىق مەسىلىلەردە ساقچى ۋە قوراللىق ساقچىلار بىلەن ماسلىشىدىغانلىقىنى تەكىتلىگەن.

شىنخۇا ئاخبارات ئاگېنتلىقىنىڭ خەۋىرىگە قارىغاندا ، خىتاي دائىرىلىرى جۈمە كۈنى بېيجىڭ، تيەنجىن، ئىچكى موڭغۇل ۋە سەندۇڭ قاتارلىق جايلاردا ئولىمپىك مۇسابىقىسى " تېررورچىلار"نىڭ ھۇجۇمىغا ئۇچرىسا، ھەربىي قىسىملارنىڭ بۇنىڭغا قايتۇرىدىغان ئىنكاس كۈچىنى سىناقتىن ئۆتكۈزدى. (ئەركىن)

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت