Хитай армийиси бейҗиң олимпик мусабиқисида бихәтәрликни қоғдаш хизмитигә қатнишиду


2007.06.29
Share on WhatsApp
Share on WhatsApp

Хитай даирилири алаһидә һәрбий хизмәт қисими қуруп, 2008 - йили бейҗиңда өткүзүлидиған хәлқара олимпик мусабиқисиниң бихәтәрлик хизмитигә қатнаштуридиғанлиқини елан қилди. Хитай мәтбуатлириниң хәвиридә әскәртишичә, бу алаһидә һәрбий хизмәт қисими, қораллиқ сақчилар вә җамаәт хәвпсизлик органлириниң олимпик җәрянида террорчи вәқәләр яки тасадипий һадисиләр йүз беришидин сақлинип, олимпикниң бихәтәрликигә капаләтлик қилиш хизмитигә маслашмақчи икән.

Бейҗиң олимпик йиғини аманлиқини қоғдаш мәркизиниң мәсули тйән йишяң, пәйшәнбә күни бейҗиңдики чәтәллик һәрбий дипломатларға бейҗиң олимпик йиғини мурәккәп бихәтәрлик вәзийитигә дуч келиватқанлиқини билдүргән. У, алаһидә һәрбий хизмәт қисиминиң қуруқлуқ, деңиз вә һава армийә қисимлиридин қурулидиғанлиқини вә бу қисим террорчиларниң ғәйрий әнәниви қораллириниң болупму ядро вә химийилик қораллириниң һуҗумиға қарши туруш һәмдә һава, деңиз вә мусабиқә райониниң әтрапидики җайларниң бихәтәрлики қатарлиқ мәсилиләрдә сақчи вә қораллиқ сақчилар билән маслишидиғанлиқини тәкитлигән.

Шинхуа ахбарат агентлиқиниң хәвиригә қариғанда , хитай даирилири җүмә күни бейҗиң, тйәнҗин, ички моңғул вә сәндуң қатарлиқ җайларда олимпик мусабиқиси " террорчилар"ниң һуҗумиға учриса, һәрбий қисимларниң буниңға қайтуридиған инкас күчини синақтин өткүзди. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.