Xitay armiyisi béyjing olimpik musabiqisida bixeterlikni qoghdash xizmitige qatnishidu

Xitay da'iriliri alahide herbiy xizmet qisimi qurup, 2008 - yili béyjingda ötküzülidighan xelq'ara olimpik musabiqisining bixeterlik xizmitige qatnashturidighanliqini élan qildi. Xitay metbu'atlirining xewiride eskertishiche, bu alahide herbiy xizmet qisimi, qoralliq saqchilar we jama'et xewpsizlik organlirining olimpik jeryanida térrorchi weqeler yaki tasadipiy hadisiler yüz bérishidin saqlinip, olimpikning bixeterlikige kapaletlik qilish xizmitige maslashmaqchi iken.

Béyjing olimpik yighini amanliqini qoghdash merkizining mes'uli tyen yishyang, peyshenbe küni béyjingdiki chet'ellik herbiy diplomatlargha béyjing olimpik yighini murekkep bixeterlik weziyitige duch kéliwatqanliqini bildürgen. U, alahide herbiy xizmet qisimining quruqluq, déngiz we hawa armiye qisimliridin qurulidighanliqini we bu qisim térrorchilarning gheyriy en'eniwi qorallirining bolupmu yadro we ximiyilik qorallirining hujumigha qarshi turush hemde hawa, déngiz we musabiqe rayonining etrapidiki jaylarning bixeterliki qatarliq mesililerde saqchi we qoralliq saqchilar bilen maslishidighanliqini tekitligen.

Shinxu'a axbarat agéntliqining xewirige qarighanda , xitay da'iriliri jüme küni béyjing, tyenjin, ichki mongghul we sendung qatarliq jaylarda olimpik musabiqisi " térrorchilar"ning hujumigha uchrisa, herbiy qisimlarning buninggha qayturidighan inkas küchini sinaqtin ötküzdi. (Erkin)