Xitay öktichi'isi béyjing olimpik yighinini bayqut qilishqa chaqirdi

Meshhur xitay öktichi zatliridin a'iliside nezerbent astidiki adwokat gaw jishing amérika dölet mejlisige xet yézip, xitayning kishilik hoquqni depsende qilghanliqi we dunyadiki lükchek hakimiyetlerni qollawatqanliqi sewebidin 2008 - yili ötküzülidighan béyjing olimpik yighinini bayqut qilishni telep qildi. Gawning xéti 13 - séntebir küni yézilghan bolsimu, lékin xetning mezmuni peyshenbe küni amérika dölet mejliside ötküzülgen axbarat yighinida élan qilindi.

Gaw jishing xette," olimpik yighinining junggoda ötküzülüshige qarshi turidighan puqralar barghanche köpiyiwatidu. Ularning neziride bu olimpik qanliq olimpiktur, méyip olimpiktur " deydu. Gaw jishing amérika dölet mejlisidiki axbarat yighinida xitaydin téléfon qilip sözlimekchi bolghan bolsimu ,lékin téléfon alaqisi ornitalmidi.

Kanada parlamént ezasi deywid kilgorning eskertishiche, gaw jishing ötken ayda xitay da'iriliri teripidin bir qétim qolgha élinip türmige tashlan'ghan, ten jazasigha uchrighan we kishilik hoquq pa'aliyitidin waz kéchishke mejburlan'ghan. Amérika dölet mejlisidiki axbarat yighinida awam palata ezasi ros - létinen xanim, " béyjing hakimiyiti olimpikni keng kölemde échiwétishning pursiti, dep qarimay,, xitay xelqini basturush we kontrol qilishning pursiti hésablimaqta," dédi. U yene mundaq deydu, "béyjing hakimiyiti peqetla teshwiqat ghelibisige érishmekchi, lékin biz buninggha yol qoymasliqimiz kérek we shert. "

Washin'gton waqti gézitining xewer qilishiche, yawropa parlaméntining mu'awin re'isi édward mikmillan - skot, pütün döletler béyjing olimpik yighinini bayqut qilishi kérek, chünki xitay darfurdiki irqiy qirghinchiliqni qollawatqan we tibetlik buddistlar, Uyghurlar, axbaratchilar we gaw jishinggha oxshash kishilik hoquq, qanun pa'aliyetchilirini basturmaqta," dep tekitligen. (Erkin)