Xitay olimpik harpisida kishilik hoquqni yaxshilash bésimigha izchil duch kelmekte

Amérika birleshme agéntliqining bildürüshiche, 3 qétim olimpik su üzüsh musabiqisida altun médalgha érishken, gollandiye su üzüsh mahiri xokénbénd peyshenbe küni xelq'ara olimpik komitétining re'isi jakkuz rogining, béyjing olimpik murasimi ötküzülüshtin burun xitayning kishilik hoquq mesilisi üstide toxtilishini teshebbüs qildi.

Mezkür su üzüsh mahiri sözide, rogi ependi pütkül tenterbiyichilerge wakaliten, xitayning kishilik hoquqni yaxshilishi toghrisida ochuq ipade bildürüshi kéreklikini tekitlidi.

Bu arida kishilik hoquqni közitish teshkilatining xadimi kélina xanim, xitayning 2001 ‏- yili olimpik murasimini ötküzüsh hoquqini qolgha keltürüsh üchün, kishilik hoquqni yaxshilash heqqidiki shertlerni qobul qilghanliqini, hazir del shu wedisige emel qilidighan waqitning yétip kelgenlikini bildürüp mundaq deydu": biz yenila xitay da'irilirining dunyagha özining kishilik hoquqtiki ilgirileshlirini körsitishini xalaymiz, biraq bir qanche yillar ötüp ketti, biz héchqandaq ilgirileshni körmiduq."

Xitay tashqi ishlar ministirliqining, kishilik hoquqni yaxshilashta olimpikqa bergen wedisi toghrisidiki meydani nahayiti éniq bolup, xitay olimpikni siyasiylashturuwetmeslikni, chünki bu olimpik rohi we prinsipigha toghra kelmeydighanliqini tekitlesh bilen birge, xelq'ara jem'iyetning olimpik qa'idisige xilap heriketlerge qarshi turushini telep qilghan.

Béyjing olimpikining ötküzülüshige aran 5 ay waqit qalghan bolup, nöwette tenheriketchilerni kütiwélish shuningdek 20 minggha yéqin chet'el muxbirliri üstide tekshürüsh élip bérish xizmetliri ishlenmekte. (Eqide)‏