Xitay olimpik yighini jeryanida chet'ellik muxbirlargha qaritilghan cheklimini boshashturmaqchi

Xitay tashqi ishlar ministirliqining ashkarilishiche, xitay hökümiti jüme küni chet'ellik muxbirlargha qaritilghan axbarat cheklimisini boshashturidighan yéngi belgilime chiqirip, béyjing olimpik yighini toghrisida xewer béridighan chet'ellik muxbirlarning sayahet we axbarat erkinlikini kéngeytidighanliqini jakarlidi.

Yéngi belgilime 2007- yili 1 - ayning1 - künidin bashlap resmiy yolgha qoyulmaqchi. Belgilimide chet'ellik muxbirlargha xitaydiki her qaysi ölke - aptonom rayonlarni ruxsetsiz sayahet qilish we awam puqralar bilen söhbet ötküzüsh erkinliki bérilgen.

Xitay tashqi ishlar ministirliqi bayanatchisi lyu jyenchaw, yéngi belgilimide chet'ellik muxbirlarning "yerlik da'irilerdin ruxset élishqa hajiti qalmaydighanliqini" bildürdi. Uning eskertishiche, yéngi belgilime tibetni öz ichige alghan xitaydiki ölke - aptonom rayonlargha erkin bérishni öz ichige alidu.

Lékin fransiye axbarat agéntliqining xewer qilishiche, bu belgilime 2008 - yili 10 - ayning 17 - küni emeldin qalidiken. Lyu jyenchaw muxbirlargha mezkur belgilimining néme üchün 2008 - yili 17 - öktebirgiche yolgha qoyulidighanliqini chüshendürmidi.

Merkizi parizhdiki chégrisiz muxbirlar teshkilati 2006 - yili xitayni dunya boyiche axbarat erkinliki eng nachar döletler qatarigha kirgüzgen. (Erkin)