Xitayda namayishchilargha oq chiqarghan saqchilar az dégende ikki kishini öltürdi

Gu'angdungning shenwéy rayonida seyshenbe küni saqchilar namayishchilargha oq chiqirip, az dégende ikki kishini öltürdi, saqchilarning oqida yarilan'ghan bir kishi dongjyu doxturxanisida qutquzulmaqtiken.

Toqunush dongjyu yézidiki puqralarning shu jaydiki éléktir istansisi qurulushi bilen bolghan yer - zimin dawasidin kélip chiqqan. Weqe shu yerning waqti bilen seyshenbe küni kech sa'et 9 yérimlarda yüz bergen bolup, toqunush yéza puqralirining da'irler bilen sözlishishke ewetken üch neper wekili saqchilar teripidin qolgha élin'ghandin kéyin partlighan.

Puqralar qolgha élin'ghan wekillirini qoyup bérishni telep qilip éléktir istansisi etrapida namayish qilghan iken. Yerlik puqralarning radi'omizgha ashkarilishiche, texminen 400 - 500 dek saqchi dongjyu yézisini qorshiwalghan. Bezi puqralar 4 kishining ölgenlikini bildürmekte.

Shenwéyning mu'awin sheher bashliqi, qoshumche sheherlik jama'et xewpsizlik idarisining mudiri radi'omiz bilen sözlishishni ret qilip, " ehwalni bilmeymen " dep jawap berdi. Yer - zimin majirasi yéqinqi yillardin béri xitayda hökümet bilen puqralar otturisidiki eng jiddiy mesilige aylanmaqta. (Erkin)