Xitay ziyaliyliri namayishchilargha oq chiqirish weqesini eyiblidi

Xitay chong quruqluqidiki 50 tin artuq alimlar we ziyalilar seyshenbe küni intérnét arqiliq ochuq xet élan qilip, gu'angdongdiki dongju yézida saqchilarning namayishchilargha oq chiqirish weqesini eyiblidi we da'irilerning weqe üstidin tekshürüsh élip bérishini telep qildi. Ular weqede ölgenlerning ismini élan qilish, ölgenlerge tölem - tölesh we jawapkarlarni sürüshtürüshni telep qilghan.

Ochuq xette " biz jonggo hökümitining weqeni ashkare chüshendürüsh we éniqlashtin özini qachurghanliqini, axbarat organlirining bu toghridaxewer bérishige xeklime qoyghanliqini eyipleymiz," deydu.

Xitay tashqi ishlar ministirliki, dongju yézisida 3 namayishchining saqchilar teripidin étip öltürülgenlikini étirap qildi. Da'iriler namayishchilargha oq chiqarghan saqchining qolgha élin'ghanliqini élan qilghan bolsimu, emma yerlik puqralar buninggha guman bilen qarimaqta.

Shyenwéy sheherlik hökümet düshenbe küni namayishchilargha oq chiqarghan saqchini " özini qoghdighan", dep aqlighan idi. Yerlik qanallar da'irilerning dawamliq adem tutiwatqanliqini xewer qilghan. Ochuq xette " démokratik we erkin asasi qanun séstimisi, ochuq siyasi muhit we oxshimighan menpe'et toqunushlarni ashkare ipadileshke yol qoyulmighiche, xitayda bu xil ijtima'iy toqunushlarning tinch yollar bilen hel bolushi mumkin emes," deydu.

Ochuq xetke lyu shyawbo, déng zilin qatarliq zatlar imza qoyghan bolup, yerlik puqralar ölgenlerning 20 ge yétidighanliqini, düshenbe küni 9 puqraning qolgha élin'ghanliqini bildürmekte. Bu san hökümet terep élan qilghan sandin zor derijide perqlinidu. Xitay tashqiy ishlar ministirliki bayanatchisi chin gang, weqeni tyen'enmin weqesi bilen sélishturushni ret qildi. (Erkin)