Хитай зәһәрлик чекимликкә қарши туруш күни мунасивити билән мәмликәт бойичә өлүм җазаси иҗра қилди

Хитай һөкүмити хәлқара зәһәрлик чекимликкә қарши туруш күни мунасивити билән мәмликәт бойичә зәһәрлик чекимлик тиҗарити билән шуғулланған аз дегәндә 20 дин артуқ кишиниң өлүм җазасини иҗра қилди.

Хитай һөкүмитиниң бу һәрикити кишилик һоқуқ тәшкилатлириниң әйиблишигә учримақта. Даириләр гуйҗуда зәһәрлик чекимлик сатқан 5 кишини, чаңшада үчини җаза мәйданиға елип чиқип етип ташлиған. Шинхуа ахбарат агентлиқи, өткән һәптиниң җүмә вә шәнбә күнлири мәмликәт бойичә 20 дин артуқ зәһәрлик чекимлик сатқучиниң өлүм җазаси иҗра қилинғанлиқини хәвәр қилди.

Франсийә ахбарат агентлиқиниң хәвәр қилишичә, бейҗиң шәһәрлик юқири сот мәһкимиси аз дегәндә 20 нәпәр зәһәрлик чекимлик сатқучини сотлап, буларниң бир қисимини өлүм җазасиға һөкүм қилған.

Уйғур аптоном райони хитай бойичә зәһәрлик чекимлик чекиш әһвали әң еғир районларниң бири һесаблиниду. "Үрүмчи кәчлик гезити" ниң хәвәр қилишичә, йәкшәнбә күни үрүмчи шәһиридә 224 килограм зәһәрлик чекимлик көйдүрүветилгән. Әмма мәтбуатлар мәзкур районда шу күни өлүм җазасиға һөкүм қилинғанлар тоғрисида хәвәр бәрмиди.

Мәркизидики римдики өлүм җазасиға қарши туруш оргининиң көрситишичә, 2004 - йили дуня бойичә 5476 киши өлүм җазасиға һөкүм қилинған болуп, буниң 5 миңи хитайдикән. (Әркин)