Xitay zeherlik chékimlikke qarshi turush küni munasiwiti bilen memliket boyiche ölüm jazasi ijra qildi

Xitay hökümiti xelq'ara zeherlik chékimlikke qarshi turush küni munasiwiti bilen memliket boyiche zeherlik chékimlik tijariti bilen shughullan'ghan az dégende 20 din artuq kishining ölüm jazasini ijra qildi.

Xitay hökümitining bu herikiti kishilik hoquq teshkilatlirining eyiblishige uchrimaqta. Da'iriler guyjuda zeherlik chékimlik satqan 5 kishini, changshada üchini jaza meydanigha élip chiqip étip tashlighan. Shinxu'a axbarat agéntliqi, ötken heptining jüme we shenbe künliri memliket boyiche 20 din artuq zeherlik chékimlik satquchining ölüm jazasi ijra qilin'ghanliqini xewer qildi.

Fransiye axbarat agéntliqining xewer qilishiche, béyjing sheherlik yuqiri sot mehkimisi az dégende 20 neper zeherlik chékimlik satquchini sotlap, bularning bir qisimini ölüm jazasigha höküm qilghan.

Uyghur aptonom rayoni xitay boyiche zeherlik chékimlik chékish ehwali eng éghir rayonlarning biri hésablinidu. "Ürümchi kechlik géziti" ning xewer qilishiche, yekshenbe küni ürümchi shehiride 224 kilogram zeherlik chékimlik köydürüwétilgen. Emma metbu'atlar mezkur rayonda shu küni ölüm jazasigha höküm qilin'ghanlar toghrisida xewer bermidi.

Merkizidiki rimdiki ölüm jazasigha qarshi turush orginining körsitishiche, 2004 - yili dunya boyiche 5476 kishi ölüm jazasigha höküm qilin'ghan bolup, buning 5 mingi xitaydiken. (Erkin)